ఖరీఫ్ సీజన్‌లో వరి సాగు చేసే రైతులకు సూచనలు: శాస్త్రవేత్త సలహాలు

ఖరీఫ్ సీజన్‌లో రైతులు వరి నాట్లు వేసేందుకు సిద్ధమవుతున్నారు. జగిత్యాల ప్రాంతీయ వ్యవసాయ పరిశోధన స్థానం ప్రధాన శాస్త్రవేత్త శ్రీలత రైతులకు పలు సూచనలు చేశారు.

జూలై 15 లోపు మధ్యకాలిక, స్వల్పకాలిక రకాలను మాత్రమే నాటాలని ఆమె సూచించారు. నారు ముదరకుండా ఉండేందుకు నారుమడిలో నత్రజని ఎరువులు తగ్గించాలని చెప్పారు. జింక్, ఇనుము లోపాలు కనిపిస్తే జింక్ సల్ఫేట్, అన్నభేదిని పిచికారీ చేయాలి.

నాటు వేసే ముందు కార్బో ఫిరాన్ గుళికలు నారుమడికి వేస్తే కాండం తొలుచు పురుగును ప్రధాన పొలంలోకి రాకుండా ఆపవచ్చని శ్రీలత తెలిపారు. నాటిన 3-5 రోజుల్లో బుటాక్ క్లోర్ లేదా ప్రెటిలా క్లోర్ వాడితే మొదటి దశ కలుపు అరికట్టవచ్చు. 8-10 రోజుల తర్వాత బెన్సల్ఫియాన్ మిథైల్, పైరజో సల్ఫిరాన్ ఈథైల్ వంటి కాంబినేషన్ మందులు వాడొచ్చు.

ఎరువుల విషయంలో దమ్ము చేసేటప్పుడు ఎకరాకు ఒక బస్తా DAP, అరబస్తా పొటాష్, ఒక బస్తా యూరియా వేయాలని సూచించారు. పిలక, పొట్ట దశల్లో యూరియా, పొటాష్ ఇస్తే దిగుబడి బాగుంటుంది. కాంప్లెక్స్ ఎరువులు పైపాటుగా వేయడం వల్ల సల్ఫైడ్ నష్టం జరుగుతుందని హెచ్చరించారు. పొలం చుట్టూ కాలువలు ఏర్పాటు చేసుకోవాలని రైతులకు తెలిపారు.