ఖరీఫ్ సీజన్‌లో వరి పంటకు IPM చర్యలు – శాస్త్రవేత్త డాక్టర్ మాలతి సూచనలు

తెలంగాణలో ఖరీఫ్ సీజన్‌ ప్రారంభంలో వరి సాగు చేపట్టిన రైతులకు, పంటలో చీడపీడల నివారణకు సమగ్ర సస్యరక్షణ చర్యలపై వ్యవసాయ శాస్త్రవేత్త డాక్టర్ ఎస్. మాలతి కీలక సూచనలు చేశారు.

ఈ ఏడాది తెలంగాణలో దాదాపు 44 లక్షల ఎకరాల్లో వరి సాగవుతుండగా, రైతులు అధికంగా సన్నరకాల వరినే ఎంచుకుంటున్నారు. సన్న రకాలకు చీడపీడలు ఎక్కువగా ఆశించే అవకాశం ఉండటంతో, ముందస్తు యాజమాన్యం ద్వారా నష్టాన్ని తగ్గించుకోవచ్చని ఆమె తెలిపారు.

వరిలో ప్రధానంగా ఉల్లికోడు, కాండం తొలిచి పురుగు, సుడిదోమ వంటి పురుగులు ఆశిస్తాయి. అలాగే అగ్గి తెగులు, బ్యాక్టీరియా ఆకు ఎండు తెగులు, పాము పొడ తెగులు, కాటుక తెగులు వంటి తెగుళ్లు కూడా విస్తరించే ప్రమాదముంది.

వీటిని అరికట్టేందుకు నారుమడిలో, ప్రధాన పొలంలో తొలి దశలో కార్బోఫిరాన్ గుళికలు వేయాలని డాక్టర్ మాలతి సూచించారు. నారుమడికి ఎకరానికి 800 గ్రాముల కార్బోఫిరాన్ గుళికలు, నాటు వేసిన 20 రోజులకు పొలంలో ఎకరానికి 10 కిలోల చొప్పున వేస్తే ఉల్లికోడును అదుపు చేయవచ్చని వివరించారు.

నీటి యాజమాన్యంలో అడపదడప పొలం ఆరబెట్టడం, ప్రతి రెండు మీటర్లకు గాలిబాటలు తీయడం, నత్రజని ఎరువును సిఫార్సు మేరకే దఫాలుగా వేయడం వంటి పద్ధతులు పాటించాలన్నారు.

గత రబీలో కాటుక తెగులు విస్తృతంగా రావడంతో, ఈ సీజన్‌లో తప్పనిసరిగా విత్తన శుద్ధి చేయాలని హెచ్చరించారు. కార్బన్డజం పొడితో పొడి విత్తన శుద్ధి లేదా నానబెట్టే పద్ధతి ద్వారా సంక్రమించే తెగుళ్లను నివారించవచ్చని తెలిపారు.

పంట తొలి దశ నుంచే సుడిదోమ తగ్గేందుకు పైపాటు పిచికారీ కన్నా గుళికల రూపంలోనే సస్యరక్షణ చేయడం ఉత్తమమని చెప్పారు. రైతులు ప్రతిరోజూ పొలాన్ని గమనిస్తూ, తెగుళ్లు ఆశించిన వెంటనే సిఫార్సు చేసిన మందులు వాడాలని శాస్త్రవేత్తలు సూచిస్తున్నారు.