వరి నారుమడిలో పురుగుల నివారణ చర్యలు: కృషి విజ్ఞాన కేంద్రం సూచనలు

తెలుగు రాష్ట్రాల్లో వరి నారుమడి దశలో పురుగుల నివారణపై జమ్మికుంట కృషి విజ్ఞాన కేంద్రం (KVK) శాస్త్రవేత్త శ్రీనివాస రెడ్డి ముఖ్యమైన సూచనలు చేశారు. ముందస్తు చర్యలు తీసుకోకపోతే దిగుబడి తగ్గే ప్రమాదం ఉందని హెచ్చరించారు.

నారుమడిలో పసుపు రంగు రెక్కల పురుగులు కనిపిస్తే వేప నూనెతోపాటు ఎస్ఫేట్, క్లోరోబైర్పాస్, కొరాసిన్ లేదా కెల్డాన్ పొడిని పిచికారీ చేయాలని సూచించారు. వీటి వల్ల గుడ్ల దశలోని పురుగులు నశిస్తాయి.

నాట్లు వేయడానికి ఒక వారం ముందు కార్బోఫిరాన్, పెట్టరా లేదా కెల్డాన్ గుళికలను ఎకరా నారుమడికి 900 గ్రాముల నుంచి 1 కిలో వరకు వేయాలి. ఇలా చేస్తే నారుమడి విషపూరితమై, కాండం తొలిచే పురుగు బారినుంచి రక్షణ లభిస్తుంది.

నాట్లు వేసే సమయంలో ప్రతి 2 మీటర్లకు 25-30 సెం.మీ. వెడల్పు ఖాళీగా వదిలి తూర్పు-పడమర దిశగా కాలిబాటలు ఏర్పాటుచేస్తే గాలి, వెలుతురు సక్రమంగా ప్రసరించి పురుగుల ఉదృతి తగ్గుతుంది.

నాట్ల తర్వాత 15-20 రోజులకు ఎకరానికి 4-8 లింగాకర్షక బుట్టలు పెట్టాలి. ఇవి ఆడ రెక్కల పురుగులను ఆకర్షించి, జనాభాను నియంత్రిస్తాయి. బుట్టలు లభించకపోతే 5-6 ఎకరాలకు ఒక సోలార్ లైట్ ట్రాప్ ఉపయోగించుకోవచ్చు.

నాట్లు వేసి నెలరోజుల తర్వాత కార్బోఫిరాన్ 3G 10 కిలోలు, కెల్డాన్ 8 కిలోలు లేదా పెట్టరా 4 కిలోలు (ఎకరాకు) వేస్తే కాండం తొలిచే పురుగు లార్వాలను నివారించవచ్చు. ఆ తర్వాత పురుగుల ఉధృతి కనిపిస్తే క్లోరాంత్రానిలిప్రోల్, ప్రొక్లియమ్ వంటి మందులను ఎకరాకు 100 మి.లీ. చొప్పున పిచికారీ చేసి తెల్లకంకి బారి నుంచి పంటను కాపాడుకోవాలి.