పార్లమెంట్ వర్షాకాల సమావేశాలు 20 నుంచి; 130వ రాజ్యాంగ సవరణ బిల్లుపై చర్చ

దేశంలో పార్లమెంట్ వర్షాకాల సమావేశాలు ఈ నెల 20వ తేదీ నుంచి ప్రారంభం కానున్నాయి.

ఈ సమావేశాలు ఆగస్టు 13 వరకు కొనసాగుతాయి. ఈ సెషన్‌లో కేంద్ర ప్రభుత్వం పలు కీలక బిల్లులను ప్రవేశపెట్టనుంది. డీలిమిటేషన్ బిల్లు, ఒకే దేశం ఒకే ఎన్నికల బిల్లు ఇందులో ఉన్నాయి. అంతేకాకుండా, 30 రోజులకు మించి జైలులో ఉన్న ప్రజా ప్రతినిధుల పదవులు రద్దు చేసే 130వ రాజ్యాంగ సవరణ బిల్లును కూడా ప్రవేశపెట్టనున్నారు.

తీవ్ర నేరాల కేసుల్లో అరెస్ట్ అయిన ప్రధానమంత్రి, ముఖ్యమంత్రులు, మంత్రులు సహా ఇతర ప్రజా ప్రతినిధులు 30 రోజులకు మించి జైల్లో ఉంటే వారి పదవులు రద్దు అయ్యేలా ఈ బిల్లు రూపొందించారు. ఇది ప్రజా ప్రతినిధుల్లో జవాబుదారీతనం పెంచుతుందని, అవినీతిని నియంత్రిస్తుందని కేంద్ర ప్రభుత్వం తెలిపింది. గతేడాది ఆగస్టులో బిల్లును ప్రవేశపెట్టినప్పుడు విపక్షాల తీవ్ర అభ్యంతరాలతో దాన్ని పార్లమెంటరీ సంయుక్త కమిటీ (జేపీసీ)కి పంపించారు. జేపీసీ ప్రస్తుతం రాష్ట్రాల అభిప్రాయాలు సేకరిస్తోంది.

బీజేపీ పాలిత రాష్ట్రాలు ఈ బిల్లుకు మద్దతు ఇస్తుండగా, ఇండియా కూటమి రాష్ట్రాలు వ్యతిరేకిస్తున్నాయి. ఇటీవలి రాజ్యసభ ఎన్నికల్లో ఎన్డీఏ అభ్యర్థులు గణనీయమైన విజయం సాధించారు. దీంతో ఉభయ సభల్లో కేంద్ర ప్రభుత్వ బలం పెరిగింది.