పాట్నాలోని పాట్లీపుత్ర స్టేషన్‌లో విద్యార్థుల నిరసన హింసాత్మకం; రైల్వే ఐజీకి గాయం, పోలీసుల టియర్ గ్యాస్

బిహార్ రాజధాని పాట్నాలోని పాట్లీపుత్ర జంక్షన్‌లో సోమవారం ఉదయం పరీక్ష అభ్యర్థులు చేపట్టిన ఆందోళన అదుపుతప్పి హింసాత్మకంగా మారింది. అదనపు రైళ్లు, సరిపడా కోచ్‌లు లేవని ఆరోపిస్తూ వందలాది మంది విద్యార్థులు రైల్వే ట్రాక్‌లను బ్లాక్ చేశారు. ఈ క్రమంలో కొందరు రాళ్లు విసిరారు. పరిస్థితి అదుపుదాటడంతో భద్రతా సిబ్బంది టియర్ గ్యాస్ షెల్స్ ప్రయోగించి గుంపును చెదరగొట్టారు.

ఈ గందరగోళంలో రైల్వే ఐజీ జితేంద్ర రాణా మెడ భాగంలో స్వల్ప గాయపడ్దారు. ఆయన్ని స్థానికంగా చికిత్స అందించారు. పోలీసులు మాట్లాడుతూ, ప్రస్తుతం స్టేషన్‌లో పరిస్థితి అదుపులో ఉందని, రైల్వే ట్రాక్‌లను క్లియర్ చేశామని తెలిపారు. ఈ ఘటనపై దర్యాప్తు ప్రారంభించినట్లు అధికారులు వెల్లడించారు.

సమాచారం ప్రకారం.. బీహార్ బోర్డు పరీక్షలకు హాజరు కావడానికి వచ్చిన విద్యార్థులను తీసుకెళ్లేందుకు తగినన్ని రైళ్లు లేవని, ప్రత్యేక రైళ్లు నడపాలన్న డిమాండ్‌తో ఆందోళన మొదలైంది. అయితే చర్చలు విఫలమైన తర్వాత విద్యార్థులు ట్రాక్‌పైకి చేరుకుని నిరసన తెలిపారు. ఈ ఘటనతో కొన్ని రైళ్ల రాకపోకలకు అంతరాయం కలిగింది.

బిహార్‌లో ఇటీవల పరీక్ష సీజన్‌లలో ఇలాంటి ఆందోళనలు తరచూ జరుగుతున్నాయి. గతంలోనూ ఇదే స్టేషన్‌లో విద్యార్థులు రైళ్లను నిలుపుదల చేసిన సందర్భాలు ఉన్నాయి. ఈ నేపథ్యంలో రైల్వే శాఖ అదనపు చర్యలు చేపట్టాలని ప్రయాణీకులు కోరుతున్నారు.

అలాగే ఈ హింసాత్మక నిరసన ఘటనపై రైల్వే, స్థానిక పోలీసు అధికారులు సంయుక్త దర్యాప్తును ప్రారంభించారు. నిందితులను గుర్తించేందుకు స్టేషన్‌లోని సీసీ కెమెరాల ఫుటేజీ పరిశీలిస్తున్నట్లు తెలిసింది. ప్రస్తుతం స్టేషన్‌లో పరిస్థితి సాధారణ స్థితికి చేరుకుంది.