రాజకీయ పార్టీలను గుడ్డిగా ఫాలో అవ్వద్దని యువతకు పవన్ కళ్యాణ్ సూచన

ఆంధ్రప్రదేశ్ డిప్యూటీ ముఖ్యమంత్రి, జనసేన అధ్యక్షుడు పవన్ కళ్యాణ్ యువతకు రాజకీయాల్లో ఆలోచనాత్మకంగా ముందడుగు వేయాలని సూచించారు. ప్రస్తుత సోషల్ మీడియా యుగంలో యువత కేవలం ప్రచారం చూసి నిర్ణయాలు తీసుకోవద్దని, చదవడం, నేర్చుకోవడం, ప్రశ్నించడం ద్వారా సొంత అవగాహన ఏర్పరచుకోవాలని ఆయన అన్నారు.

దిల్లీలో జరిగిన నిరసనలు, అరబ్ స్ప్రింగ్ వంటి ఉద్యమాల్లో యువత శారీరకంగా ఎంతగా పోరాడినా, ఎన్నికలు మాత్రం సంప్రదాయ రాజకీయ పార్టీలే గెలిచాయని పవన్ కళ్యాణ్ గుర్తుచేశారు. యువతలో కోపం, అశాంతి సహజమే అయినా, వాటిని సరైన దిశగా మళ్లించగలిగితే అవి సమాజాన్ని, దేశాన్ని మార్చే శక్తిగా మారుతాయని చెప్పారు. యువత ఏ వ్యక్తిగత నాయకుడిని, రాజకీయ పార్టీని గుడ్డిగా ఫాలో కావద్దని హెచ్చరించారు.

స్వాతంత్ర్య సమరయోధులైన భగత్ సింగ్, చంద్రశేఖర్ ఆజాద్, నేతాజీ సుభాష్ చంద్రబోస్, డాక్టర్ బి.ఆర్. అంబేద్కర్, సర్దార్ వల్లభాయ్ పటేల్, మహాత్మా గాంధీల జీవితాలను యువత చదవాలని ఆయన సూచించారు. 'విప్లవం యొక్క ఖడ్గం ఆలోచనల పదునుపట్టే రాయిపై పదును పెట్టబడుతుంది' అన్న భగత్ సింగ్ మాటలను పవన్ కళ్యాణ్ ఉటంకించారు.