పవన్ కళ్యాణ్‌కు రొటేటర్ కఫ్ గాయం నిర్ధారణ; సర్జరీని వాయిదా వేసినట్లు సమాచారం

ఆంధ్రప్రదేశ్ ఉప ముఖ్యమంత్రి, జనసేన పార్టీ చీఫ్ పవన్ కల్యాణ్ భుజం నొప్పితో ఇబ్బంది పడుతూ సోమవారం ముంబైలోని కోకిలాబెన్ ధీరుబాయి అంబాని ఆసుపత్రికి వెళ్లారు. ఆయన వైద్య పరీక్షలు చేయించుకున్నారు.

వైద్య పరీక్షల్లో రెండు భుజాల రొటేటర్ కఫ్ కండరాలు తీవ్రంగా దెబ్బతిన్నట్లు, కండరాలు చిట్లిపోయినట్లు తేలింది. దీంతో చేయి పైకెత్తడం, బరువులు మోయడం వంటి కదలికలు కూడా బాధాకరంగా మారాయని వైద్యులు గుర్తించారు. గాయం తీవ్రత దృష్ట్యా తక్షణమే సర్జరీ అవసరమని సూచించారు.

అయితే, పవన్ కల్యాణ్ సర్జరీ చేయించుకునే బదులు, ముందుగా నిర్ణయించిన అధికారిక కార్యక్రమాలను పూర్తి చేసేందుకు సర్జరీని వాయిదా వేసుకున్నట్లు అధికారిక వర్గాలు తెలిపాయి. దీనిపై ఆయన వైద్యులకు తన నిర్ణయం తెలియజేశారు. ప్రస్తుతం ఆయన ఆరోగ్య స్థితిపై వస్తున్న వార్తలు వాస్తవమేనని, అవసరమైన జాగ్రత్తలు తీసుకుంటున్నట్లు సంబంధిత వర్గాలు పేర్కొన్నాయి.

ఈ క్రమంలో పవన్ కల్యాణ్ ఇటీవల జరిగిన క్యాబినెట్ సమావేశంలో నొప్పి కారణంగా మధ్యలోనే వైదొలిగినట్లు సమాచారం. ఆయన త్వరలోనే సర్జరీ చేయించుకుని కోలుకుంటారని భావిస్తున్నారు.