వానాకాలం ముందస్తు చర్యలు: గ్రామాల్లో పారిశుద్ధ్యంపై డిప్యూటీ సీఎం పవన్ కల్యాణ్ సూచనలు

వర్షాకాలం నేపథ్యంలో గ్రామాల్లో సీజనల్ వ్యాధుల నివారణకు ముందస్తు చర్యలు తీసుకోవాలని డిప్యూటీ సీఎం పవన్ కల్యాణ్ పంచాయతీ రాజ్, గ్రామీణాభివృద్ధి శాఖ అధికారులను ఆదేశించారు. పారిశుద్ధ్య నిర్వహణ, తాగునీటి భద్రత, దోమల నియంత్రణపై అధికారులతో సమీక్ష నిర్వహించారు.

ప్రతి గ్రామ పంచాయతీ ప్రజారోగ్యాన్ని ప్రాధాన్యతగా తీసుకోవాలని సూచించారు. బ్లీచింగ్ పౌడర్, క్లోరిన్ బిళ్ళలు అన్ని పంచాయతీల్లో అందుబాటులో ఉంచాలని, మురుగునీరు నిల్వ ఉండకుండా చూసి దోమల వ్యాప్తిని అడ్డుకోవాలని చెప్పారు.

ఘన వ్యర్థాల నిర్వహణ, రోజువారీ చెత్త సేకరణ శాస్త్రీయ పద్ధతిలో చేయాలని, బహిరంగ ప్రదేశాల్లో చెత్త వేయకుండా ప్రజలకు అవగాహన కల్పించాలని కోరారు. ‘Friday Dry Day’ కార్యక్రమాన్ని రాష్ట్రవ్యాప్తంగా కచ్చితంగా అమలు చేయాలన్నారు. వాట్సాప్ గ్రూపులు, మైక్ అనౌన్స్‌మెంట్ల ద్వారా ప్రచారం చేయాలని సూచించారు.

పాఠశాలలు, అంగన్వాడీ కేంద్రాల్లో తాగునీటి నాణ్యతపై తరచూ తనిఖీలు నిర్వహించాలని, పైపులైన్లలో లీకేజీలు లేకుండా చూడాలని ఆదేశించారు.