పంచాయతీ రాజ్ వ్యవస్థను పటిష్ఠం చేస్తామని డిప్యూటీ సీఎం పవన్ కల్యాణ్ హామీ

ప్రభుత్వ స్పెషల్ చీఫ్ సెక్రటరీ కఠారి వెంకట కృష్ణ పదవీ విరమణ కార్యక్రమంలో డిప్యూటీ సీఎం పవన్ కల్యాణ్ పాల్గొన్నారు. ఈ సందర్భంగా ఆయన పంచాయతీ రాజ్ వ్యవస్థను మరింత బలోపేతం చేస్తామని హామీ ఇచ్చారు.

36 ఏళ్ల సుదీర్ఘ సర్వీసును పూర్తి చేసిన వెంకట కృష్ణను పవన్ కల్యాణ్ మార్గదర్శిగా అభివర్ణించారు. ఆయన మరకలేని అధికారిగా గుర్తింపు పొందారని, ఆయన సేవలను మరో మూడేళ్లు కొనసాగించేలా ప్రభుత్వం చర్యలు తీసుకుంటోందని తెలిపారు.

గత ప్రభుత్వ హయాంలో పంచాయతీ రాజ్ వ్యవస్థ బలహీనపడిందని పవన్ కల్యాణ్ విమర్శించారు. సరైన ప్రణాళికలు, విజన్ లేకపోవడం వల్ల స్థానిక సంస్థల నిధులు మళ్లించబడ్డాయని, గ్రామసభల నిర్లక్ష్యం పంచాయతీలను దెబ్బతీసిందని చెప్పారు. ప్రస్తుత ప్రభుత్వం ఈ లోపాలను సరిదిద్ది గ్రామ పంచాయతీలకు పూర్వ వైభవం తీసుకువస్తామని పేర్కొన్నారు. గత రెండేళ్లలో నేరుగా గ్రామ పంచాయతీల ఖాతాలకు 4,200 కోట్లు బదిలీ చేసినట్లు చెప్పారు.

ఉద్యోగుల మనోధైర్యం దెబ్బ తినకుండా ప్రభుత్వం చూస్తుందని ఆయన స్పష్టం చేశారు. ప్రమోషన్లు, బదిలీల్లో పూర్తి పారదర్శకత తీసుకొచ్చామని, పంచాయతీ రాజ్ శాఖలో 10 వేలకు పైగా ప్రమోషన్లు కల్పించామని తెలిపారు. అలాగే 77 మంది అధికారులకు జెడ్పి సీఈఓలుగా పదోన్నతులు ఇచ్చినట్లు గుర్తు చేశారు.

స్థానిక సమస్యలు గ్రామ, మండల స్థాయిలో పరిష్కారం కావాలని, చిన్న చిన్న సమస్యలకు ప్రజలు సీఎం లేదా డిప్యూటీ సీఎం వరకు రావాల్సిన పరిస్థితి పరిపాలనలో లోపాన్ని చూపిస్తుందని వ్యాఖ్యానించారు. గ్రామాభివృద్ధిలో అధికారులు, ప్రజా ప్రతినిధులు, ప్రజలు భాగస్వాములుగా పనిచేయాలని సూచించారు. గత ప్రభుత్వంలో ఆక్రమణలకు గురైన గ్రేజింగ్ ల్యాండ్స్, కమ్యూనిటీ భూములు, తైతర ప్రభుత్వ స్థలాలను రక్షించే బాధ్యత అధికారులు తీసుకోవాలని ఆదేశించారు.