కాళేశ్వరం బ్యారేజీల మరమ్మతులపై హైకోర్టులో పిటిషన్; సోమవారానికి విచారణ వాయిదా

కాళేశ్వరం ప్రాజెక్టులోని మూడు బ్యారేజీల మరమ్మత్తులు చేపట్టకపోవడంపై తెలంగాణ హైకోర్టులో పిటిషన్ దాఖలైంది. న్యాయవాది శరత్ కుమార్ ఈ పిటిషన్ దాఖలు చేశారు.

పిటిషనర్ వాదనల ప్రకారం, నేషనల్ డ్యామ్ సేఫ్టీ అథారిటీ (NDSA) ఇచ్చిన సూచనలను రాష్ట్ర ప్రభుత్వం, ఇరిగేషన్ శాఖ పట్టించుకోలేదు. భారీగా ప్రజాధనం ఖర్చు చేసి నిర్మించిన కాళేశ్వరం ప్రాజెక్టు వృథా అవుతోందని, రాజకీయ కారణాలతోనే మరమ్మత్తులు చేపట్టడం లేదని ఆయన కోర్టు దృష్టికి తీసుకువచ్చారు.

దీనిపై విచారణ చేపట్టిన హైకోర్టు NDSA, తెలంగాణ ప్రభుత్వం, ఇరిగేషన్ శాఖ, కేంద్ర జలశక్తి మంత్రిత్వ శాఖ, రిటైర్డ్ ఇంజనీర్స్ అసోసియేషన్ అధ్యక్షుడు శ్యాం ప్రసాద్ రెడ్డిలకు నోటీసులు జారీ చేసింది. ప్రభుత్వం తరపు న్యాయవాది సోమవారం తమ వాదనలు వినిపిస్తామని తెలపడంతో విచారణను ఆ రోజుకు వాయిదా వేసింది. సోమవారం ప్రభుత్వ వాదనల అనంతరం న్యాయస్థానం తదుపరి ఉత్తర్వులు ఇవ్వనుంది.