దేశంలో తొలి హైడ్రోజన్ రైలుకు ప్రధాని మోదీ పచ్చజెండా ఊపారు

దేశంలో తొలి హైడ్రోజన్ ప్యాసింజర్ రైలుకు ప్రధాని నరేంద్ర మోదీ హర్యానాలోని జింద్ రైల్వే స్టేషన్‌లో పచ్చజెండా ఊపారు. డీజిల్, బొగ్గు లేదా ఓవర్‌హెడ్ విద్యుత్‌తో కాకుండా హైడ్రోజన్ ఫ్యూయల్ సెల్స్ ద్వారా సొంతంగా విద్యుత్ ఉత్పత్తి చేసుకునే ఈ రైలు పూర్తిగా కాలుష్య రహితం. దీని నుంచి నీటి ఆవిరి మాత్రమే వెలువడుతుంది, ఎలాంటి హానికర వాయువులు రావు.

రెండు పవర్ కార్లు, ఎనిమిది కోచ్‌లతో ఈ రైలు 2,600 మంది ప్రయాణికులను తీసుకెళ్లగలదు. గరిష్ఠ వేగం 110 కి.మీ., కానీ జింద్-సోనిపట్ మార్గంలో 75 కి.మీ. వేగంతో సర్వీస్ మొదలవుతుంది. రైలు ఆపరేషన్ కోసం ఇండియన్ రైల్వే జింద్‌లో దేశంలోనే అతిపెద్ద హైడ్రోజన్ రీఫ్యూయలింగ్ స్టేషన్ నిర్మించింది.

భద్రతకు అత్యంత ప్రాధాన్యత ఇచ్చారు. హైడ్రోజన్ లీక్ డిటెక్టర్లు, ఫైర్, స్పోక్ సెన్సార్లు, ఆటోమేటిక్ షట్‌డౌన్ వ్యవస్థతో పాటు రియల్ టైమ్ మానిటరింగ్ ఇందులో ఉన్నాయి. దీంతో హైడ్రోజన్ మండే స్వభావం ఉన్నప్పటికీ సురక్షితమైన ప్రయాణం సాధ్యమవుతుంది.

జింద్-సోనిపట్ మధ్య 89 కి.మీ. మార్గంలో 12 స్టేషన్లలో ఆగుతూ ఈ రైలు నడుస్తుంది. దీంతో గ్రీన్ రైలు రవాణా దిశగా ఇండియన్ రైల్వే పెద్ద ముందడుగు వేసింది. రాబోయే సంవత్సరాల్లో కల్కా-శిమ్లా వంటి హెరిటేజ్ మార్గాల్లోనూ హైడ్రోజన్ రైళ్లు ప్రవేశపెట్టాలని ప్రణాళిక ఉంది.