పునర్నిర్మించిన హైటెక్ సిటీ రైల్వే స్టేషన్‌ను జూలై 17న ప్రారంభించనున్న ప్రధాని మోదీ

హైదరాబాద్‌లోని హైటెక్ సిటీ రైల్వే స్టేషన్‌ను ప్రధాని నరేంద్ర మోదీ జూలై 17న వర్చువల్‌గా ప్రారంభించనున్నారు. ఈ స్టేషన్‌ను రూ.26 కోట్లతో పునర్నిర్మించారు.

గతంలో ఈ స్టేషన్‌లో రేకుల షెడ్డు, ఒకే ప్లాట్‌ఫాం, కొన్ని బెంచీలు మాత్రమే ఉండేవి. ప్రస్తుతం నాలుగు లిఫ్టులు, రెండు బెల్ట్ లిఫ్టులు, ఫుట్ ఓవర్ బ్రిడ్జ్, సీసీ కెమెరాలు, వెయిటింగ్ హాలు, శుభ్రమైన టాయిలెట్లు, ఉచిత వై-ఫై, కొత్త టికెట్ కౌంటర్లు, డిస్ప్లే బోర్డులు, పార్కింగ్ సౌకర్యాలు ఏర్పాటు చేశారు.

ఐటీ ఉద్యోగులు ఎక్కువగా ప్రయాణించే ఈ స్టేషన్‌లో రోజూ సుమారు 3,000 మంది ప్రయాణికులు రాకపోకలు సాగిస్తారు. రోజుకు 62 రైళ్లు ఈ మార్గంలో నడుస్తాయి. భవిష్యత్తులో ప్రయాణికుల సంఖ్య పెరిగినా సరిపడేలా 30-40 ఏళ్ల అవసరాలను దృష్టిలో పెట్టుకుని స్టేషన్‌ను ఆధునీకరించారు.

అమృత్ స్టేషన్ పథకం కింద చేపట్టిన ఈ పనులు పూర్తయ్యాయి. స్టేషన్ ఆవరణలో సెల్ఫీ పాయింట్, 'ఐ లవ్ హైటెక్ సిటీ' బోర్డు కూడా ఏర్పాటు చేశారు. ప్రధాని మోదీ ఢిల్లీ నుంచి ఆన్‌లైన్ ద్వారా రిబ్బన్ కటింగ్ చేసి స్టేషన్‌ను ప్రారంభించనున్నారు.