గుజరాత్‌లో PM Modi శంకుస్థాపన: బయో CNG ప్లాంట్లు, మెట్రో విస్తరణ, 14,400 కోట్ల ప్రాజెక్టులు

ప్రధానమంత్రి నరేంద్ర మోదీ గుజరాత్‌లో రెండు రోజుల పర్యటన చేస్తున్నారు. ఈ పర్యటనలో 14,400 కోట్లకు పైగా విలువైన అభివృద్ధి ప్రాజెక్టులకు భూమి పూజ మరియు ప్రారంభోత్సవాలు నిర్వహిస్తున్నారు.

బనాస్కాంతాలో పశువుల సంతానోత్పత్తి మరియు జన్యు అభివృద్ధికి సంబంధించిన ఆధునిక పరిశోధన కేంద్రాన్ని మోదీ ప్రారంభించారు. అలాగే రెండు బయో CNG ప్లాంట్ల నిర్మాణానికి శంకుస్థాపన చేశారు.

వ్యవసాయ మౌలిక సదుపాయాల నిధి కింద 4,950 కోట్ల వ్యయంతో పూర్తైన 521 ప్రాజెక్టులను ప్రధాని జాతికి అంకితం చేయబోతున్నారు. వీటిలో కోల్డ్ స్టోరేజీలు, గిడ్డంగులు మరియు ఆహార శుద్ధి కేంద్రాలు ఉన్నాయి.

గుజరాత్‌లో 4,030 కొత్త అంగన్వాడీ కేంద్రాల నిర్మాణానికి శంకుస్థాపన చేయడంతో పాటు ఇప్పటికే పూర్తైన 361 కేంద్రాలను ప్రారంభిస్తారు. ఈ కార్యక్రమాలకు 800 కోట్లు కేటాయించారు.

అహ్మదాబాద్ మెట్రో ఫేజ్ 2A మరియు ఫేజ్ 2B విస్తరణ పనులకు శంకుస్థాపన చేయబోతున్నారు. ఫేజ్ 2A లో కోటేశ్వర్ రోడ్ నుంచి విమానాశ్రయం వరకు 6 కిలోమీటర్లకు పైగా మార్గాన్ని ఐదు స్టేషన్లతో అభివృద్ధి చేయనున్నారు. ఫేజ్ 2B లో GIFT సిటీ నుంచి షాపూర్ వరకు 3.3 కిలోమీటర్లకు పైగా మార్గంలో మూడు స్టేషన్లు నిర్మించనున్నారు.

అహ్మదాబాద్ మొహసానా రహదారిని నాల్గు వరుసల నుంచి ఎనిమిది వరుసలకు విస్తరించే 2,600 కోట్ల ప్రాజెక్టుకు కూడా శంకుస్థాపన చేయబోతున్నారు.

రేపు సర్దార్ వల్లభాయి పటేల్ 151వ జయంతి సందర్భంగా ఏక్తా నగర్‌లో జరిగే జాతీయ ఐక్యత దినోత్సవ కార్యక్రమాల్లో మోదీ పాల్గొంటారు. అక్కడ 400 కోట్లకు పైగా విలువైన పర్యాటక మౌలిక సదుపాయాల ప్రాజెక్టులను ప్రారంభిస్తారు.