ప్రధాని మోదీ నేడు కీలక కార్యదర్శుల సమావేశం; రేపు కేబినెట్ భేటీ – ఎజెండాలో సంస్కరణలు

ప్రధాని నరేంద్ర మోదీ మంగళవారం మధ్యాహ్నం 4:30 గంటలకు ఢిల్లీలోని 7, లోక్ కళ్యాణ్ మార్గ్‌లోని తన అధికారిక నివాసంలో అన్ని కేంద్ర శాఖల కార్యదర్శులతో కీలక సమావేశం నిర్వహించనున్నారు. ఈ భేటీలో సంస్కరణలు, ప్రభుత్వ విధానాల అమలుపై లోతైన చర్చ జరపనున్నారు. బుధవారం ఉదయం ప్రధాని అధ్యక్షతన వారంవారీ కేబినెట్ సమావేశం కూడా జరగనుంది. అయితే, కేబినెట్ విస్తరణ లేదా మార్పులపై వస్తున్న ఊహాగానాలను అధికారిక వర్గాలు తోసిపుచ్చాయి. జూలై మూడో వారం నుంచి పార్లమెంట్ వర్షాకాల సమావేశాలు ప్రారంభం కావడంతో ఆ ముందు మంత్రివర్గంలో ఎలాంటి మార్పులు ఉండబోవని వారు స్పష్టం చేశారు.

ఇదిలా ఉండగా, గత మే 21న ప్రధాని మోదీ మంత్రి మండలి సమావేశం నిర్వహించారు. ఆ భేటీలో కూడా సంస్కరణల అజెండాపై చర్చించారు. ఇప్పుడు మంగళవారం కార్యదర్శుల సమావేశం, ఆ తర్వాత బుధవారం కేబినెట్ సమావేశంతో సంస్కరణల అమలు వేగవంతం చేసే అవకాశం ఉంది. ఈ రెండు రోజులు కేంద్రపాలనలో కీలక నిర్ణయాలకు వేదిక కానున్నాయి.

మరోవైపు, ప్రధాని మోదీ ఇటీవల విదేశీ పర్యటన నుంచి తిరిగి వచ్చారు. జపాన్ ప్రధాని ఫుమియో కిషిదా స్వల్పకాలంలో భారత పర్యటనకు రానుండటంతో ఆ కార్యక్రమాల్లో ప్రధాని బిజీగా ఉంటారు. ఆ తర్వాత ఆయన ఇండోనేషియా, ఆస్ట్రేలియా, న్యూజిలాండ్ దేశాల పర్యటనకు బయలుదేరుతారు. దీంతో మంత్రివర్గ విస్తరణకు సమయం లేదని వర్గాలు తెలిపాయి. మొత్తంగా, ఈ వారం సంస్కరణల ఎజెండా ప్రాధాన్యత సంతరించుకుంది.