"షార్ట్‌కట్ మిమ్మల్ని కట్ చేస్తుంది": యువతకు ప్రధాని మోదీ కీలక సూచన

సోషల్ మీడియా రీళ్ల ప్రభావం నుండి యువత దూరంగా ఉండాలని, షార్ట్‌కట్లు ప్రమాదకరమని ప్రధాని నరేంద్ర మోదీ హెచ్చరించారు. ఓ కార్యక్రమంలో మాట్లాడుతూ, రైల్వే స్టేషన్‌లలో కనిపించే "Shortcut Will Cut You Short" అనే హెచ్చరికను ఉదహరించారు. పట్టాల మీదుగా నడవడం, బ్రిడ్జి వాడకపోవడం వంటి షార్ట్‌కట్లు ఎలా ప్రమాదకరమో, అదే విధంగా జీవితంలోనూ షార్ట్‌కట్లు తీవ్ర నష్టాలను కలిగిస్తాయని ఆయన హెచ్చరించారు.

సోషల్ మీడియాలో ఇన్‌ఫ్లుయెన్సర్లు చూపించే ఊహాజనిత విజయాల వైపు యువత ఆకర్షితం అవుతున్న నేపథ్యంలో ప్రధాని ఈ మాటలు చెప్పారు. "షార్ట్‌కట్ ప్రయత్నాలు మిమ్మల్ని తీవ్ర ఇబ్బందుల్లోకి నెట్టేస్తాయి, దీర్ఘకాలంలో విజయం సాధించాలంటే కృషి, ఓపిక అవసరం" అని ఆయన ఉద్ఘాటించారు. సత్వర విజయం అనే భ్రమలో పడకుండా, జీవిత చరిత్రలు (ఆత్మకథలు) చదవాలని యువతకు సూచించారు.

ఈ సందర్భంగా ప్రధాని గోవింద్ జీ పేరు ప్రస్తావిస్తూ, ఆయన జీవిత చరిత్ర ద్వారా యువత ఎంతో నేర్చుకోవచ్చని అన్నారు. "గోవింద్ జీ యొక్క శ్రమ రాబోయే తరాలకు, ముఖ్యంగా యువతకు ఉపయోగపడుతుంది" అని అభిప్రాయపడ్డారు. ఆత్మకథలు చరిత్రలోని సంఘటనలను వేరే కోణంలో అర్థం చేసుకోవడానికి అవకాశం కల్పిస్తాయని, వాటి ద్వారా జీవితంలో నిజమైన స్ఫూర్తి లభిస్తుందని ప్రధాని వివరించారు.

ప్రధాని మోదీ తరచుగా యువతకు పుస్తక పఠనం ప్రాముఖ్యతను గురించి చెబుతుంటారు. నూతన సాంకేతికత, సోషల్ మీడియా ప్రభావంతో యువతరం తక్కువ సమయంలో పేరు, డబ్బు సంపాదించాలని కోరుకుంటున్న తరుణంలో ఆయన చేసిన ఈ వ్యాఖ్యలు ప్రాధాన్యం సంతరించుకున్నాయి.