కొండా సురేఖ మాజీ OSD సుమంత్ డ్రైవర్‌ను పోలీసులు అదుపులోకి

మంత్రి కొండా సురేఖ మాజీ OSD సుమంత్ డ్రైవర్‌ను పోలీసులు అదుపులోకి తీసుకున్నారు. ఈ ఘటన జూబ్లీహిల్స్ పోలీస్ స్టేషన్ పరిధిలో జరిగిందని తెలుస్తోంది.

మేడిపల్లి పోలీసులు ముందుగా జీరో FIR నమోదు చేశారు. ఆ తర్వాత కేసును జూబ్లీహిల్స్ పోలీసులకు బదిలీ చేశారు. బాధితుడి ఫిర్యాదు ప్రకారం సుమంత్, మరికొందరు కలిసి తనను మేడిపల్లి నుంచి జూబ్లీహిల్స్ పరిధిలోని ఓ ఆఫీసుకు పిలిపించారు. అక్కడ తనపై దాడి చేసి రూ.10 కోట్లు డిమాండ్ చేశారని ఆరోపించారు.

బాధితుడు తీవ్ర గాయాలతో చికిత్స పొందాడు. గత నెలలో జరిగిన ఈ ఘటనపై ఆలస్యంగా ఫిర్యాదు ఇచ్చినట్లు తెలిసింది. పోలీసులు సుమంత్‌తో పాటు మొత్తం ఆరుగురిపై కేసు నమోదు చేశారు.

సుమంత్ కోసం ప్రత్యేక బృందాలు గాలింపు చర్యలు చేపట్టాయి. అతను రాష్ట్రంలో ఉన్నాడా, వేరే ప్రాంతానికి వెళ్లాడా అనే కోణంలో దర్యాప్తు కొనసాగుతోంది. డ్రైవర్‌ను అదుపులోకి తీసుకున్న తర్వాత సుమంత్ ఆచూకీపై మరిన్ని వివరాలు తెలుస్తాయని పోలీసులు భావిస్తున్నారు. ఈ ఆరోపణలపై సుమంత్ స్పందన లభ్యం కాలేదు.