హైదరాబాద్‌లో హెచ్ఐవి అవగాహన ర్యాలీకి మంత్రి పొన్నం నాయకత్వం

హైదరాబాద్‌లోని హెచ్ఎండిఏ గ్రౌండ్స్, ఐమాక్స్ సమీపంలో హెచ్ఐవి అవగాహన, నివారణ కోసం ఏర్పాటు చేసిన ప్రత్యేక కార్యక్రమంలో మంత్రి పొన్నం ప్రభాకర్, జీహెచ్ఎంసీ కమిషనర్ కర్నర్, నటుడు తనికెల భరణి పాల్గొన్నారు. ఎయిడ్స్ కంట్రోల్ సొసైటీ డైరెక్టర్ విద్యాసాగర్ ఆధ్వర్యంలో ఈ కార్యక్రమం జరిగింది.

మంత్రి పొన్నం మాట్లాడుతూ, హెచ్ఐవి పై ప్రతి ఒక్కరికీ అవగాహన ఉండాలని, ఈ వ్యాధిపై ఉన్న అపోహలు, భయాలను తొలగించాల్సిన అవసరం ఉందని అన్నారు. హెచ్ఐవి బాధితుల పట్ల వివక్ష చూపవద్దని, పరీక్షలు, కౌన్సెలింగ్, చికిత్స సేవలను ప్రజలు సద్వినియోగం చేసుకోవాలని సూచించారు. డిజిటల్ విధానాల ద్వారా హెచ్ఐవి సమాచారాన్ని సులభంగా అందించే ప్రయత్నం చేస్తున్నట్లు తెలిపారు.

ఈ సందర్భంగా హెచ్ఎండిఏ గ్రౌండ్స్ నుంచి పీపుల్స్ ప్లాజా వరకు ర్యాలీ నిర్వహించారు. మహిళలు, విద్యార్థులు పెద్ద సంఖ్యలో పాల్గొన్నారు. ఎయిడ్స్ రహిత తెలంగాణ నిర్మాణం సామాజిక బాధ్యతగా భావించాలని, ప్రభుత్వం ఈ దిశగా కృషి చేస్తోందని మంత్రి పేర్కొన్నారు.

హెచ్ఐవి శరీరంలోకి ప్రవేశిస్తే నయం చేయలేని స్థితి ఉన్నా, ఆధునిక వైద్యం చికిత్సా పద్ధతులను అభివృద్ధి చేసింది. అయితే నివారణే మేలని, రోగం రాకముందే జాగ్రత్తలు తీసుకోవడం ముఖ్యమని మంత్రి సూచించారు.