విశాఖకు రాష్ట్రపతి ద్రౌపది ముర్ము రాక.. రెడ్ అలర్ట్, డ్రోన్ నిషేధం

రాష్ట్రపతి ద్రౌపది ముర్ము రేపు విశాఖపట్నంలో పర్యటించనున్నారు. ఆమె గిరిజన విశ్వవిద్యాలయం తొలి స్నాతకోత్సవంలో ముఖ్య అతిథిగా పాల్గొంటారు.

రాష్ట్రపతి పర్యటన నేపథ్యంలో ఈరోజు నుంచి మూడు రోజుల పాటు విశాఖ నగరంలో రెడ్ అలర్ట్ ప్రకటించారు. పర్యటన జరిగే ప్రాంతాలను తాత్కాలిక రెడ్ జోన్‌లుగా గుర్తించి భద్రత కట్టుదిట్టం చేశారు.

డ్రోన్ కెమెరాల వినియోగాన్ని నిషేధిస్తూ విశాఖ పోలీస్ కమిషనర్ ఆదేశాలు జారీ చేశారు. రాష్ట్రపతి మార్గంలో 2 కిలోమీటర్ల పరిధిలో డ్రోన్లు ఎగరేయడం నిషిద్ధం. నిబంధనలు ఉల్లంఘిస్తే ఎయిర్ క్రాఫ్ట్ చట్టం 1934 కింద కేసు నమోదు చేస్తామని హెచ్చరించారు.

రేపు మధ్యాహ్నం 2 గంటలకు విశాఖపట్నం విమానాశ్రయం చేరుకున్న అనంతరం రాష్ట్రపతి నవాతల్ హోటల్ వరకు రోడ్డు మార్గంలో వెళ్తారు. ఈ ప్రాంతాలన్నీ పోలీసుల ఆధీనంలో ఉంటాయి.

స్నాతకోత్సవం రేపు మధ్యాహ్నం 3 నుంచి 4 గంటల మధ్య జరుగుతుంది. ఈ కార్యక్రమంలో కేంద్ర విద్యాశాఖ మంత్రి ధర్మేంద్ర ప్రధాన్, రాష్ట్ర విద్యాశాఖ మంత్రి నారా లోకేష్, హోం మంత్రి కూడా పాల్గొనే అవకాశం ఉంది.

ఎలాంటి అవాంచిత సంఘటనలు జరగకుండా జిల్లా కలెక్టర్, పోలీసు ఉన్నతాధికారులు పూర్తి స్థాయి భద్రతా ఏర్పాట్లు పర్యవేక్షిస్తున్నారు.