ప్రొద్దుటూరులో ప్లాస్టిక్ నిషేధం: కమిషనర్ దుకాణాల తనిఖీ

కడప జిల్లా ప్రొద్దుటూరు పట్టణంలో ప్లాస్టిక్ నిషేధాన్ని కఠినంగా అమలు చేసేందుకు పురపాలిక కమిషనర్ శ్రీనివాస విశ్వనాథ్ రంగం సిద్ధం చేశారు. ఆయన పట్టణంలోని పలు దుకాణాలు, తోపుడు బండ్లను తనిఖీ చేశారు. వ్యాపారులు ప్లాస్టిక్ వాడకుండా వ్యాపారం చేయాలని, ప్లాస్టిక్ నిషేధం గురించి సహకరించాలని సూచించారు.

తనిఖీల్లో భాగంగా, కమిషనర్ స్వయంగా 'ప్లాస్టిక్ వాడము' అనే బోర్డు రాసి ఒక తోపుడుబండి వద్ద వేలాడదీశారు. అందరు వ్యాపారులు తమ దుకాణాల ముందు ఇలాంటి బోర్డులు ఏర్పాటు చేయాలని ఆదేశించారు. ప్లాస్టిక్ వాడకంతో మురుగు కాలువలు మూసుకుపోవడం, వర్షాకాలంలో నీరు నిలిచిపోవడం వల్ల ప్రజలు ఆరోగ్య సమస్యలు ఎదుర్కొంటున్నారని కమిషనర్ వివరించారు.

ప్రొద్దుటూరును ప్లాస్టిక్ రహిత నగరంగా తీర్చిదిద్దేందుకు ప్రతి ఒక్కరూ కృషి చేయాలని కోరారు. ప్లాస్టిక్ లేకుండా కూడా వ్యాపారం చేసుకోవచ్చని, ఇందుకు వ్యాపారంలో స్వల్ప నష్టం జరిగినా పర్వాలేదని అన్నారు. ఈ పద్ధతిని కొనసాగించాలని, ఇతరులకు తెలియజేయాలని కమిషనర్ సూచించారు.