పుణే కేతన్ అగర్వాల్ హత్య కేసులో కోటి రూపాయల లావాదేవీలు కీలకం

పుణే కేతన్ అగర్వాల్ హత్య కేసులో కొత్త కోణం వెలుగులోకి వచ్చింది. దర్యాప్తులో భారీ ఆర్థిక లావాదేవీలు కీలకంగా మారాయి. నిందితురాలు సియా గోయల్ కేతన్ పేరుతో దాదాపు ఒక కోటి రూపాయల రుణం తీసుకున్నట్లు పోలీసులు అనుమానిస్తున్నారు. ఆ రుణాన్ని కేతన్‌కు తెలియకుండా వివిధ సంస్థల నుంచి సేకరించినట్లు దర్యాప్తు అధికారులు గుర్తించారు.

పోలీసుల ప్రాథమిక విచారణ ప్రకారం, సియా గోయల్ ఈ మొత్తాన్ని కేతన్ అనుమతి లేకుండా స్వంత కెరీర్ అభివృద్ధి కోసం, తన ప్రియుడు చేతన్ చౌదరికి సహాయం చేయడానికి ఉపయోగించినట్లు తెలుస్తోంది. కేతన్ ఈ లావాదేవీలపై అభ్యంతరం వ్యక్తం చేయడంతో ఇద్దరి మధ్య తీవ్ర విభేదాలు తలెత్తాయి. ఈ వివాదమే చివరకు హత్యకు దారితీసిందా లేక ఇతర కారణాలు ఉన్నాయా అన్న కోణంలో పోలీసులు దర్యాప్తు చేస్తున్నారు.

ఈ కేసులో సియా గోయల్ తన కాబోయే భర్త కేతన్ అగర్వాల్‌ను ప్రియుడు చేతన్ చౌదరితో కలిసి లోహగడ్ కోట వద్ద ట్రెక్కింగ్ పేరుతో తీసుకెళ్లి కొండపై నుంచి తోసివేసినట్లు ఆరోపణలు ఉన్నాయి. మొదట విగ్గు వివాదం, వ్యక్తిగత అసమ్మతి వంటి కోణాలు చర్చలో ఉండగా, ఇప్పుడు ఆర్థిక లావాదేవీలపై దృష్టి పెరిగింది.

పోలీసులు కేతన్ అగర్వాల్, సియా గోయల్, చేతన్ చౌదరిల బ్యాంకు ఖాతాలు, యూపీఐ లావాదేవీలు, డిజిటల్ చాటింగ్‌లను పరిశీలిస్తున్నారు. సియా గోయల్ తీసుకున్న రుణాన్ని కేతన్‌కు తెలియకుండా ప్రియుడి ఖాతాకు బదిలీ చేసిందా లేదా అన్న అంశంపై విచారణ కొనసాగుతోంది. ప్రస్తుతం పోలీసులు మాత్రం అధికారికంగా నిందితులపై తుది నిర్ధారణకు రాలేదు. దర్యాప్తు పూర్తయిన తర్వాతే అసలు నిజాలు బయటపడతాయని అధికారులు తెలిపారు.