పూణే వ్యాపారవేత్త హత్య కేసులో కీలక పరిణామం: హుడీ ధరించిన అనుమానితుడు సియా ప్రియుడు చేతనే

పూణేలో యువ వ్యాపారవేత్త కేతన్ అగర్వాల్ మృతి కేసులో పోలీసుల దర్యాప్తు కీలక మలుపు తిరిగింది. సీసీటీవీ ఫుటేజీ ఆధారంగా హుడీ ధరించి కేతన్, సియాను అనుసరించిన వ్యక్తి సియా ప్రియుడు చేతనేనని పోలీసులు ప్రాథమికంగా నిర్ధారించారు.

జూన్ 18న లోహగడ్ కోట సమీపంలో ట్రెక్కింగ్కు వెళ్లిన కేతన్ లోయలో పడి మృతి చెందాడు. కేతన్తో పాటు ఉన్న సియా గోయల్ చెప్పిన వివరాలపై అనుమానం వచ్చిన పోలీసులు సీసీటీవీ దృశ్యాలను పరిశీలించారు. ఆ వీడియోలో 33 డిగ్రీల వడగాలుల్లో హుడీ ధరించిన ఓ వ్యక్తి వీరిని వెంబడించడం గమనించారు. సియా వెనక్కి తిరిగి చూడగా ఆ వ్యక్తి వెంటనే కూర్చుండిపోవడంతో అనుమానం మరింత బలపడింది.

దర్యాప్తులో భాగంగా సియా కాల్ రికార్డులను పరిశీలించగా, చేతన్తో ఆమె 2004 నుంచి సన్నిహితంగా ఉన్నట్లు తేలింది. వీరిద్దరు 238 గంటల పాటు ఫోన్లో మాట్లాడినట్లు రికార్డులు వెల్లడించాయి. ఈ డేటా ఆధారంగా ఇద్దరి మధ్య ప్రేమ సంబంధం ఉన్నట్లు ధ్రువీకరించారు. చేతన్ సోషల్ మీడియా ప్రొఫైల్ను పోల్చి హుడీ వ్యక్తి అతడేనని గుర్తించారు. చేతన్ తన ఫోన్ ఇంటి వద్దే వదిలిపెట్టి, ఇంటర్నెట్ ఆపివేయడం అనుమానాన్ని పెంచింది.

కేతన్ తండ్రి విశాల్ అగర్వాల్ పోలీసులకు ఇచ్చిన వాంగ్మూలంలో, సియా కేతన్ను పలుసార్లు లోహగడ్ కోటకు తీసుకెళ్లాలని ఒత్తిడి చేసిందని తెలిపారు. మే 31న ఇద్దరూ అక్కడికి వెళ్లగా, జూన్ 4న మళ్లీ అక్కడికి వెళ్తామని సియా కోరిందని, అయితే కేతన్ తల్లి అంగీకరించలేదని వివరించారు. పాస్పోర్ట్ కనిపించకపోవడంతో బాలికి వెళ్లే ప్రీ-వెడ్డింగ్ షూట్ రద్దు కావడం, సియా కేతన్ అడ్డు తొలగించుకోవాలనుకోవడం వంటి అంశాలు వెలుగులోకి వచ్చాయి. జూన్ 14న చేసిన ట్రెక్కింగ్లో కేతన్ పొదను పట్టుకుని ప్రాణాపాయం నుంచి తప్పించుకున్నాడని, నాలుగు రోజుల తర్వాత జూన్ 18న అదే ప్రాంతంలో మృతి చెందాడని తండ్రి తెలిపారు.

పోలీసులు సియా గోయల్, చేతన్లను అదుపులోకి తీసుకున్నారు. కేతన్ను లోయలోకి తోసి ప్రమాదంగా చిత్రీకరించినట్లు అనుమానిస్తున్నారు. ఈ విషయంపై మరింత దర్యాప్తు కొనసాగుతోంది.