ఫీజు రీయింబర్స్మెంట్ బకాయిలు: ఆమరణ దీక్ష హెచ్చరిక చేసిన బీసీ నేత ఆర్. కృష్ణయ్య

తెలంగాణలో ఫీజు రీయింబర్స్మెంట్ బకాయిలు వెంటనే చెల్లించాలని బీసీ నేత ఆర్. కృష్ణయ్య డిమాండ్ చేశారు. బకాయిలు చెల్లించకపోతే ఆమరణ నిరాహార దీక్ష చేపడతానని హెచ్చరించారు.

హైదరాబాద్ బషీర్బాగ్ ప్రెస్ క్లబ్‌లో జాతీయ బీసీ సంక్షేమ సంఘం ఏర్పాటు చేసిన సమావేశంలో ఆయన ముఖ్య అతిథిగా పాల్గొన్నారు. ఈ సందర్భంగా మాట్లాడుతూ, ఎస్సీ, ఎస్టీ, బీసీ, మైనారిటీ విద్యార్థుల రీయింబర్స్మెంట్ బకాయిలు ఇవ్వకుండా ముఖ్యమంత్రి రేవంత్ రెడ్డి కుట్ర చేస్తున్నారని ఆరోపించారు.

కాంగ్రెస్ పార్టీలో మంత్రులు, అధికారులు, కార్యకర్తలు సైతం బకాయిలు చెల్లించాలని కోరుతున్నా, సీఎం మాత్రం ఈ పథకాన్ని ఎత్తివేయాలని చూస్తున్నారని కృష్ణయ్య విమర్శించారు. తనతో బహిరంగ చర్చకు రావాలని సవాల్ చేశారు.

ఫీజు రీయింబర్స్మెంట్‌కు సంబంధించిన కేసు హైకోర్టులో విచారణలో ఉన్నట్టు తెలిపారు. కోర్టు ఆదేశాలు ఉన్నప్పటికీ ప్రభుత్వం నిధులు విడుదల చేయడం లేదని ఆరోపించారు. ఈ అంశంపై సీఎం కార్యాలయ స్పందన లభ్యం కాలేదు.