వర్షాకాలంలో గొర్రెలు, మేకల సంరక్షణ: తీసుకోవాల్సిన జాగ్రత్తలు, వ్యాధి నివారణ చిట్కాలు

వర్షాకాలంలో గొర్రెలు, మేకలకు రకరకాల ఆరోగ్య సమస్యలు ఎదురవుతాయి. ఈ నేపథ్యంలో పశువుల పెంపకందారులు కొన్ని ముఖ్యమైన జాగ్రత్తలు తీసుకోవాలని నిపుణులు సూచిస్తున్నారు.

గన్నవరం ఎన్టీఆర్ కాలేజ్ ఆఫ్ వెటర్నరీ సైన్స్ డీన్ వెంకట శేషయ్య తెలిపిన వివరాల ప్రకారం, వర్షాకాలంలో గొర్రెలను రాత్రిపూట తప్పనిసరిగా పాకల్లో ఉంచాలి. ప్రతి గొర్రెకు కనీసం ఒక చదరపు మీటర్ స్థలం, పెరిగే పిల్లలకు అర చదరపు మీటర్, పొట్టేళ్లకు మూడు చదరపు మీటర్ల స్థలం ఇవ్వాలి. షెడ్ నేలను సిమెంట్ కాంక్రీట్ చేయకుండా మొరంతో నింపాలి. ఏటా లేదా రెండేళ్లకు ఒకసారి పాత మట్టిని తీసి ఎరువుగా వాడి, కొత్త మట్టి నింపితే వ్యాధి సమస్యలు రాకుండా ఉంటాయి. గోడలు ఒక మీటర్ ఎత్తు ఉండి పైన లింక్డ్ వైర్ మెష్ ఉంటే గాలి వెలుతురు సరిగా ఉంటుంది. పైకప్పు మూడు అడుగుల చూరు ఉంటే వర్షపు జల్లు లోపలికి రాదు.

వర్షంలో తడవడం వల్ల జీవాలకు కాలిపుల్ల వ్యాధి, న్యుమోనియా, గొంతు వాపు (పాస్టర్లోసిస్) వంటి వ్యాధులు సోకే అవకాశం ఉంది. నీరు నిలిచే ప్రదేశాల్లో మేపకుండా, ఎత్తైన ప్రదేశాల్లో మాత్రమే మేపాలి. పిల్లలను వర్షంలో తడవకుండా చూడటం, పోషకాహారం ఇవ్వడం చాలా అవసరం. పిల్లలకు రోజుకు 200-250 గ్రాముల దాణా ఇస్తే వ్యాధి నిరోధక శక్తి పెరుగుతుంది.

అంతర్గత పరాన్నజీవుల నివారణకు నీరు నిలిచిన చోట తాగించకూడదు. ప్రతి రైతు తప్పనిసరిగా పేడ పరీక్ష చేయించి, పరాన్నజీవులు ఉంటే పశు వైద్యుడి సలహాతో మందులు వాడాలి. వర్షాకాలం రాకముందే గొంతువాపు వంటి వ్యాధులకు సంబంధించిన టీకాలు వేయించాలి. వ్యాధి లక్షణాలు కనిపించగానే వెంటనే చికిత్స అందిస్తే జీవాల మరణాలు నివారించవచ్చు.