E20 పెట్రోల్‌తో కారు డ్యామేజ్: మార్చాలని రాయపూర్ కన్స్యూమర్ కోర్టు మారుతీ సుజుకీకి ఆదేశం

E20 పెట్రోల్ వల్ల తన కారు పదేపదే చెడిపోయిందని డాక్టర్ ఇచ్చిన ఫిర్యాదుపై రాయపూర్ జిల్లా వినియోగదారుల కోర్టు Maruti Suzuki కి కీలక ఆదేశాలు జారీ చేసింది. వాహనాన్ని 45 రోజుల్లో కొత్త E20 కంపాటిబుల్ కారుతో రీప్లేస్ చేయాలని, లేదంటే కారు పూర్తి ధరను తిరిగి చెల్లించాలని కోర్టు స్పష్టం చేసింది. దీనికి తోడు మానసిక వేదనకు ₹1 లక్ష నష్టపరిహారం, ఆలస్యమైతే 7% వార్షిక వడ్డీ కూడా విధించింది.

ఈ కేసు రాయపూర్‌కు చెందిన డాక్టర్ ప్రేమ్‌రాజ్ దేవదా దాఖలు చేశారు. జూన్ 2024లో హైబ్రిడ్ కారు కొనుగోలు చేసిన ఆయన నవంబర్‌లో E20 పెట్రోల్ నింపిన తర్వాత ఇంజిన్ సమస్యలు ఎదుర్కొన్నారు. సర్వీస్ సెంటర్‌లో పెట్రోల్ నాణ్యత సరిగా లేదని చెప్పినా, పెట్రోల్ పంప్ నుంచి సమస్య లేదని ఇ-మెయిల్ రావడంతో గందరగోళం ఏర్పడింది. కోర్టు విచారణలో కారు జనవరి 2023 మోడల్ అని, అంటే 17 నెలల పాత స్టాక్ అని, అప్పటి మోడల్‌కు 20% ఇథనాల్ బ్లెండ్‌కు సపోర్ట్ లేదని తేలింది. షోరూమ్ మాత్రం దీనిని E20 కంపాటిబుల్‌గా విక్రయించింది.

కంపెనీ స్పందిస్తూ, ఈ కారు పూర్తిగా E20 కంపాటిబుల్ అని, యజమాని మాన్యువల్‌లో కూడా అదే విషయం రాసి ఉందని, పెట్రోల్ కల్తీ కారణంగానే సమస్య వచ్చిందని వాదించింది. అంతేకాకుండా, ఈ ఆదేశాల్లో కీలక వాస్తవాలు ప్రతిబింబించలేదని, పై కోర్టును ఆశ్రయిస్తామని Maruti Suzuki ప్రకటించింది. భారతదేశం 2025 నాటికి 20% ఇథనాల్ మిశ్రమాన్ని తప్పనిసరి చేసే దిశగా అడుగులు వేస్తున్న తరుణంలో ఈ తీర్పు వినియోగదారులకు పెద్ద ఊరటగా మారింది.