ఖమ్మంలో రైతు భరోసా సదస్సు రద్దు, హైదరాబాద్‌లో నేడు నిధుల విడుదల

తెలంగాణ ప్రభుత్వం రైతు భరోసా సదస్సును ఖమ్మం జిల్లాలో నిర్వహించాల్సి ఉండగా, భారీ వర్షాల కారణంగా హైదరాబాద్‌కు మార్చింది. రేపు సాయంత్రం 4 గంటలకు శిల్పకళా వేదికలో ఈ సమావేశం జరుగుతుంది.

గత వారం రోజులుగా ఉమ్మడి ఖమ్మం జిల్లాలో కురిసిన భారీ వర్షాలకు సభా ప్రాంగణం నీటితో నిండిపోయింది. టెంట్లు, పోల్‌లు పడిపోవడంతో సభా స్థలం బురదమయంగా మారింది. మంత్రులు తుమ్మల నాగేశ్వర రావు, పొంగులేటి శ్రీనివాస్‌రెడ్డి, డిప్యూటీ సీఎం భట్టి విక్రమార్క సంఘటన స్థలాన్ని పరిశీలించారు. దీంతో సభను రద్దు చేస్తున్నట్లు సీఎంఓ అధికారులు ప్రకటించారు.

అయితే, రైతు భరోసా నిధుల విడుదలకు ఎలాంటి అంతరాయం కలగకుండా, హైదరాబాద్‌లోని శిల్పకళా వేదికలో ఈ కార్యక్రమాన్ని నిర్వహిస్తున్నారు. సీఎం రేవంత్ రెడ్డి ఈ సదస్సులో పాల్గొని, నిధులను విడుదల చేస్తారు.

ప్రభుత్వం సుమారు 70 లక్షల ఎకరాలకు గాను రూ.9,000 కోట్ల నిధులు రైతుల ఖాతాల్లో జమ చేయనుంది. ఈ నిధులు ప్రస్తుతం రెండు ఎకరాల వరకు ఇవ్వనుండగా, ఐదు ఎకరాల వరకు ఇచ్చే అవకాశంపై సీఎం రేపు స్పష్టత ఇవ్వనున్నారు.

ఈ కార్యక్రమాన్ని రాష్ట్రవ్యాప్తంగా ఉన్న రైతు వేదికల ద్వారా వర్చువల్‌గా వీక్షించే ఏర్పాట్లు చేశారు. రైతులు స్థానిక వేదికల వద్ద ఒక గంట ముందుగా చేరుకోవాలని అధికారులు సూచించారు.