13 ఏళ్ల బాలిక సామూహిక అత్యాచారం కేసులో 4 హోటళ్ల కూల్చివేత; 12 మంది అరెస్ట్

రాజస్థాన్‌లోని శ్రీ గంగానగర్‌లో 13 ఏళ్ల బాలికపై సామూహిక అత్యాచారం జరిగిన ఘటనలో పోలీసులు 12 మందిని అరెస్ట్ చేశారు. ఈ కేసుకు సంబంధించిన నాలుగు హోటళ్లను అధికారులు రాత్రి సమయంలో బుల్డోజర్లతో కూల్చివేశారు. మొత్తం 32 మందిపై ఆరోపణలు ఉన్నాయి.

పోలీసుల కథనం ప్రకారం, ఇంట్లో నుంచి తప్పిపోయిన బాలికను ఓ రిక్షా డ్రైవర్ హోటల్‌కు తీసుకెళ్లాడు. అక్కడ ఆమెపై పలువురు వ్యక్తులు లైంగిక దాడికి పాల్పడినట్లు ఆరోపణలు వచ్చాయి. బాలిక తప్పిపోయిన తర్వాత కుటుంబ సభ్యులు ఫిర్యాదు చేయడంతో పోలీసులు దర్యాప్తు ప్రారంభించారు.

ఈ సంఘటన స్థానికంగా తీవ్ర ఆగ్రహాన్ని రేకెత్తించింది. ప్రజల నుంచి పెద్ద ఎత్తున నిరసనలు రావడంతో జిల్లా యంత్రాంగం వేగంగా చర్యలు చేపట్టింది. లైంగిక దాడి జరిగినట్లు ఆరోపణలు ఎదుర్కొంటున్న నాలుగు హోటళ్లను బుల్డోజర్లతో కూల్చివేయించింది. అర్ధరాత్రి దాటినా ఈ కూల్చివేత ఆపరేషన్ కొనసాగడం గమనార్హం.

32 మంది నిందితుల్లో 12 మందిని ఇప్పటికే అరెస్ట్ చేయగా, మిగతా వారి కోసం గాలింపు కొనసాగుతోంది. దోషులకు ఎలాంటి మినహాయింపు ఉండదని, కఠిన శిక్షలు పడేలా చట్ట ప్రకారం చర్యలు తీసుకుంటామని పోలీసులు స్పష్టం చేశారు. దర్యాప్తు కొనసాగుతుండగా, మిగతా నిందితుల అరెస్టుపై ప్రజల ఆసక్తి నెలకొంది.