రామమందిర దోపిడీ కేసు: నిందితుడి అక్రమాస్తులపై బుల్డోజర్ చర్య

రామమందిర విరాళాల దోపిడీ కేసులో నిందితుడు లవకుశ్ మిశ్రా ఆస్తులపై యోగి ప్రభుత్వం బుల్డోజర్ చర్య చేపట్టింది. అయోధ్య నగర పాలక సంస్థ నోటీసు జారీ చేసిన అనంతరం లవకుశ్‌కు చెందిన అసంపూర్తి భవనాలను శుక్రవారం నేలమట్టం చేశారు. India Today బృందం ఈ ఆస్తిని గుర్తించింది. లవకుశ్ మిశ్రా నెలకు రూ.12-15వేల జీతంపై పని చేస్తూ, గత ఫిబ్రవరిలో అయోధ్య నగరంలో 1000 చదరపు అడుగుల స్థలాన్ని రూ.8.8 లక్షలకు కొనుగోలు చేసి, భార్య సుప్రియ మిశ్రా పేరిట నమోదు చేశాడు. అక్కడ నిర్మాణం ప్రారంభమైనా, ఇటీవల కార్మికులు పనిచేయడం మానేశారని, కుటుంబం పరారీలో ఉన్నట్లు స్థానికులు చెబుతున్నారు. ఈ స్థలాన్ని ఆలయ విరాళాల సొమ్ముతోనే సంపాదించినట్లు దర్యాప్తు సంస్థ అనుమానిస్తోంది.

ఈ కేసు దర్యాప్తు విస్తృతం కాగా, SIT ఇప్పుడు రామమందిర ట్రస్ట్ పై దృష్టి సారించింది. గత ఐదేళ్ల ఆడిట్లు, ప్రతి ఆర్థిక లావాదేవీని పరిశీలిస్తోంది. లెక్కలో లేని స్వర్ణాభరణాలు, నగదు లెక్కింపులో లోపాలు, భద్రతా వైఫల్యాలు తదితర అంశాలపై విచారణ ముమ్మరం చేసింది. ట్రస్ట్ మాజీ ధర్మకర్తలు ఆనంద్ మిశ్రా, చంపత్ రాయ్‌లను ఇప్పటికే ప్రశ్నించగా, గోపాల్ రావును ఈరోజు విచారించనుంది. జూలై 15న నివేదిక దాఖలు చేయాల్సి ఉంది. విచారణలో ఆనంద్ మిశ్రా కీలక ప్రశ్నలకు సమాధానం చెప్పలేదని, చంపత్ రాయ్, టిన్నూ యాదవ్‌లపై నిందారోపణ చేశాడని సమాచారం.

ఇదిలావుండగా, అయోధ్య బార్ అసోసియేషన్ ట్రస్ట్ ఉన్నతాధికారులపై FIR నమోదు చేయాలని పోలీసులను ఆశ్రయించింది. చంపత్ రాయ్, ఆనంద్ మిశ్రా, గోపాల్ రావులపై ఫిర్యాదు చేయడానికి రామజన్మభూమి పోలీస్ స్టేషన్‌లో దరఖాస్తు చేయనున్నారు. ఈ తరహా మోసం చేసిన వ్యక్తులకు న్యాయవాదులు వాదించబోమని అసోసియేషన్ ఇదివరకే ప్రకటించింది. ట్రస్ట్ అధికారులపై ప్రస్తుతం చట్టపరమైన ఒత్తిడి పెరుగుతోంది.