రామాయణ ట్రైలర్‌కు 100 కోట్ల వ్యూస్: భారతీయ సినీ చరిత్రలో రికార్డు

రామాయణ సినిమా ట్రైలర్ అన్ని భాషలు, డిజిటల్ వేదికల్లో కలిపి 100 కోట్ల వ్యూస్ సాధించింది.

ఈ చిత్రానికి నితీష్ తివారి దర్శకత్వం వహిస్తున్నారు. రణ్బీర్ కపూర్ రాముడిగా, సాయి పల్లవి సీతగా, యశ్ రావణుడిగా నటిస్తున్నారు. మొదటి భాగం నవంబర్ 6న దీపావళి కానుకగా థియేటర్లలో విడుదలవుతుంది.

వారం క్రితం విడుదలైన హిందీ ట్రైలర్‌కు వరల్డ్ ఆఫ్ రామాయణ Instagram ఖాతాలో 588 మిలియన్లకు పైగా వ్యూస్ వచ్చాయి. YouTube, Facebook, X వేదికల్లోనూ భారీ స్పందన లభించింది. ఈ ట్రైలర్ విజువల్స్ ప్రేక్షకులను ఆకట్టుకుంటున్నాయి.

అంతర్జాతీయ ప్రేక్షకుల కోసం ఏఐ ఆధారిత లిప్‌సింక్ టెక్నాలజీతో ఇంగ్లీష్ వర్షన్‌ను కూడా రూపొందించారు. సోనీ పిక్చర్స్ ప్రపంచవ్యాప్తంగా ఈ చిత్రాన్ని విడుదల చేయనుంది. హన్స్ జిమ్మర్, ఏఆర్ రెహ్మాన్ సంగీతం అందిస్తున్న ఈ చిత్రం దాదాపు ₹4,000 కోట్లతో నిర్మిస్తున్నట్టు తెలుస్తోంది.