టీజీ20 విజేత హైదరాబాద్ ఈ ఛాంపియన్స్‌కు రామోజీ గ్రూప్ సత్కారం

హైదరాబాద్ క్రికెట్ అసోసియేషన్ నిర్వహించిన తొలి టీజీ20 లీగ్ ట్రోఫీని హైదరాబాద్ ఈ ఛాంపియన్స్ గెలుచుకుంది. ఈ విజేత జట్టును రామోజీ గ్రూప్ రామోజీ ఫిలిం సిటీలో సత్కరించింది.

సబలా రెస్టారెంట్ వద్ద జట్టు సభ్యులకు ముత్యాల దండలు, తిలకంతో సంప్రదాయబద్ధంగా స్వాగతం పలికారు. అనంతరం యురేకా నుండి ఈనాడు కార్పొరేట్ కార్యాలయం వరకు వింటేజ్ కార్లు, బస్సులో ఊరేగింపు నిర్వహించారు. జట్టు సభ్యులు వింటేజ్ బస్సులో ప్రయాణిస్తుండగా, తెలంగాణ డప్పులు, నృత్యాలు, డీజే సంగీతంతో మీడియా స్ట్రీట్ లో ర్యాలీ సాగింది. రామోజీ గ్రూప్ ఉద్యోగులు జెండాలు ఊపుతూ అభినందనలు తెలిపారు.

దివంగత రామోజీరావు ప్రతిమ వద్ద ట్రోఫీని ఉంచి యాజమాన్యం నివాళి అర్పించింది. ఆ తర్వాత సితారా హోటల్‌లో ఆటగాళ్లకు సత్కారం జరిగింది. రామోజీ గ్రూప్ సీఎండీ కిరణ్ మాట్లాడుతూ, ఈ ట్రోఫీ మరో మూడు నాలుగేళ్లు హైదరాబాద్ ఈ ఛాంపియన్స్ వద్దే ఉండాలని ఆకాంక్షించారు. ఆటగాళ్లు భారత జట్టు, ఐపీఎల్‌లో ఆడటాన్ని చూడాలనుకుంటున్నట్లు తెలిపారు.

మార్గదర్శి ఎండీ శైలజ కిరణ్ ఆటగాళ్ల క్రమశిక్షణ, శ్రమ, అంకిత భావాన్ని ప్రశంసించారు. విజేతలకు ప్రత్యేక బహుమతి హాంపర్లు అందించారు. ఈ సత్కారంపై ఆటగాళ్లు సంతోషం వ్యక్తం చేస్తూ, రామోజీ గ్రూప్ కుటుంబ సభ్యుల్లా గౌరవించిందని, ఇది మర్చిపోలేని అనుభవమని తెలిపారు.