రాంచీలో పరీక్ష రద్దు కోరుతున్న విద్యార్థులపై పోలీసుల లాఠీఛార్జ్‌; పలువురికి గాయాలు

జార్ఖండ్‌ రాజధాని రాంచీలో విద్యార్థి నిరసనకారులపై పోలీసులు శుక్రవారం రాత్రి లాఠీఛార్జ్ చేశారు. జెఎస్‌ఎస్‌సీ సిజిఎల్, జెపిసిఎస్ తదితర పరీక్షలను రద్దు చేయాలని, నియామకాల్లో అవినీతిపై చర్యలు తీసుకోవాలని డిమాండ్ చేస్తూ శాసనసభ వద్ద శాంతియుత ధర్నా నిర్వహిస్తున్న విద్యార్థులను పోలీసులు కర్రలతో మోది చెదరగొట్టారు. ఈ దాడిలో పలువురికి చేతులు, భుజాలు, కాళ్లకు గాయాలయ్యాయి. కొందరు పోలీసులు ప్రైవేటు భాగాలపై కూడా దాడి చేసినట్లు బాధితులు ఆరోపించారు. మీడియా సిబ్బందిని కూడా లక్ష్యంగా చేసుకున్నట్లు తెలిపారు.

15 రోజులుగా నిరసనలో ఉన్న విద్యార్థులు, శాసనసభ ఆవరణలో సాయంత్రం జనం తగ్గగానే పోలీసులు హెచ్చరిక లేకుండా ఒక్కసారిగా లాఠీఛార్జ్ ప్రారంభించారని చెప్పారు. చీకటిని ఆసరాగా తీసుకుని పోలీసులు దాదాపు రెండు కిలోమీటర్ల దూరం వరకు తరిమి కొట్టినట్లు బాధితులు తెలిపారు. ఈ ఘటనను జలియన్‌వాలా బాగ్ మారణహోమంతో పోల్చారు.

రాష్ట్ర ప్రభుత్వం అవినీతి, నియంతృత్వ ధోరణితో వ్యవహరిస్తోందని నిరసనకారులు ఆరోపించారు. తమ కోసం రాహుల్ గాంధీ ఝార్ఖండ్ రావాలని, ఆయన వచ్చే వరకు ఆమరణ నిరాహార దీక్ష కొనసాగిస్తామని ప్రకటించారు. దాడికి పాల్పడిన పోలీసులపై తక్షణ చర్యలు తీసుకోవాలని డిమాండ్ చేశారు. ఈ ఘటనపై అధికారిక స్పందన రావాల్సి ఉంది.