రా ఎన్టీఆర్ ₹100 కోట్ల సేవా కార్యక్రమం ప్రకటించడంపై వివాదం

నటుడు ఎన్టీఆర్ అభిమాన సంఘంగా చెప్పుకునే 'రా ఎన్టీఆర్' సంస్థ 100 కోట్ల రూపాయల సేవా కార్యక్రమం ప్రకటించింది. "ఊరు వాడా వస్తున్నాం" పేరుతో గ్రామాల్లో పర్యటిస్తామని, ఈ సేవా యజ్ఞానికి 100 కోట్ల రూపాయలు అవసరమని సంస్థ నిర్వాహకుడు సాయి రూప్ ప్రకటించారు.

మే 12న ఈ కార్యక్రమాన్ని సోషల్ మీడియాలో ప్రకటించగా, విరాళాల సేకరణపై అనుమానాలు రేగాయి. మే 13న ఎన్టీఆర్ కార్యాలయం స్పందించి, ఈ నిధుల సేకరణతో ఎన్టీఆర్‌కు ఎలాంటి సంబంధం లేదని స్పష్టం చేసింది. అభిమానులు మోసపోవద్దని హెచ్చరించింది.

అయినా రా ఎన్టీఆర్ సంస్థ ప్రచారం కొనసాగించింది. జూలై 18న తిరుపతిలో విలేకరుల సమావేశం ఏర్పాటు చేశారు. దీంతో ఎన్టీఆర్ అభిమానులు తిరుపతి ఎస్పీకి ఫిర్యాదు చేశారు. ఎన్టీఆర్‌పేరు, ఫొటోలను ఉపయోగించి తప్పుడు ప్రచారం చేస్తున్నారని, చట్టపరమైన చర్యలు తీసుకోవాలని కోరారు.

సాయి రూప్ మాట్లాడుతూ, 100 కోట్ల రూపాయలు ఖర్చు చేయడం కాదని, ఆ స్థాయిలో సేవా కార్యక్రమాలు చేయాలనే ఆకాంక్ష మాత్రమే అని వివరించారు. ఎన్టీఆర్ స్వయంగా వచ్చి చెపితే తాను కార్యక్రమం ఆపేస్తానని చెప్పారు. తన వెనుక 40 వేల మంది వాలంటీర్లు ఉన్నారని, ఆరేళ్లుగా సేవ చేస్తున్నానని తెలిపారు. ఎన్టీఆర్ అభిమాన సంఘం నుంచి వచ్చిన లేఖను కూడా ఆయన తప్పుపట్టారు.

ప్రస్తుతం ఈ వివాదంపై పోలీసులు ఎలాంటి చర్య తీసుకుంటారో, లేదా ఎన్టీఆర్ మరో ప్రకటన చేస్తారో చూడాలి. జూలై 18లోపు స్పష్టత రావాలని అభిమానులు కోరుతున్నారు.