రాయ్ ఎన్టీఆర్ సంస్థ 'ఊరువాడ' కార్యక్రమం ప్రారంభం; మూడు అంచెల్లో సేవా కార్యక్రమాలు

తిరుపతిలో రాయ్ ఎన్టీఆర్ సంస్థ నిర్వాహకుడు సాయి గురువారం విలేకరుల సమావేశంలో 'ఊరువాడ' అనే కొత్త కార్యక్రమం వివరాలు వెల్లడించారు. ఇది మూడు అంచెలుగా సాగుతుందని, ప్రజా సేవ, స్థానిక సమస్యల పరిష్కారానికి ఉద్దేశించిందని తెలిపారు. సంస్థ వెనుక ఎవరి రాజకీయ మద్దతు లేదని, ఇది పూర్తిగా స్వతంత్ర ప్రయత్నమని సాయి స్పష్టం చేశారు.

మొదటి అంచె 'సేవతో యువజాగృతి' పేరిట విద్యార్థులను చైతన్యపరిచే ప్రయత్నం. రాష్ట్రంలో 2,500కు పైగా అండర్ గ్రాడ్యుయేట్ కళాశాలల్లో డ్రగ్స్ వంటి సామాజిక అంశాలపై అవగాహన సదస్సులు నిర్వహించనున్నట్లు తెలిపారు. రెండో అంచె 'మన ఊరు మన బాధ్యత'లో భాగంగా ఎంపిక చేసిన గ్రామాల్లో చిన్నతరహా సమస్యలను గుర్తించి పరిష్కరించడం, రైతు సదస్సు నిర్వహించడం జరుగుతుంది. మూడో అంచె 'ఊరు మాట పాలకుల దాకా' అనే కాన్సెప్టుతో గ్రామస్థాయి సమస్యలను అధికారుల దృష్టికి తీసుకెళ్లేందుకు ప్రజలకు శిక్షణ ఇవ్వనున్నట్లు చెప్పారు.

గ్రామాల్లో చాలా చిన్న సమస్యలు నిరంతరం ప్రజలను ఇబ్బంది పెడుతుంటాయని, అయితే వాటిని అధికారికంగా ప్రజెంట్ చేయడానికి ప్రజలకు ధైర్యం, నైపుణ్యం అవసరమని సాయి అభిప్రాయపడ్డారు. ఈ కార్యక్రమం ద్వారా ప్రజలకు ప్రజెంటేషన్ స్కిల్స్, సమస్య పరిష్కార దిశగా మార్గదర్శనం చేస్తామని తెలిపారు.

ఈ కార్యక్రమం త్వరలోనే రాష్ట్రవ్యాప్తంగా అమలు చేయనున్నట్లు సాయి ప్రకటించారు. ప్రతి అంచెలో ఎంపిక చేసిన ప్రాంతాల్లో కస్టమైజ్డ్ ప్రణాళికలతో ముందుకు వెళ్తామన్నారు.