తమిళనాడు హైవేపై స్లీపర్ బస్సుకు భారీ అగ్నిప్రమాదం; డ్రైవర్ అప్రమత్తతతో 23 మంది ప్రయాణికులు సురక్షితం

చెన్నై నుంచి మధురై వెళ్తున్న ఓ ప్రైవేట్ స్లీపర్ కోచ్ బస్సులో భారీ అగ్ని ప్రమాదం చోటు చేసుకుంది. డ్రైవర్ సమయస్ఫూర్తితో వ్యవహరించడంతో బస్సులో ప్రయాణిస్తున్న 23 మంది ప్రయాణికులు సురక్షితంగా బయటపడ్డారు.

ఈ ఘటన తెల్లవారుజామున 5:30 గంటల ప్రాంతంలో పెరంబలూరు జిల్లా మంగళమేడు సమీపంలో చెన్నై-తిరుచూరాపల్లి జాతీయ రహదారిపై జరిగింది. ప్రయాణ సమయంలో ఒక్కసారిగా బస్సు నుంచి మంటలు రావడంతో డ్రైవర్ వెంటనే బస్సును రోడ్డు పక్కన ఆపి, ప్రయాణికులను అప్రమత్తం చేసి వేగంగా కిందికి దించాడు.

సమాచారం అందుకున్న అగ్నిమాపక సిబ్బంది ఘటనాస్థలానికి చేరుకుని మంటలను అదుపు చేశారు. అయితే, అప్పటికే బస్సు పూర్తిగా కాలిపోయింది. ఈ ప్రమాదం కారణంగా కొద్దిసేపు హైవేపై ట్రాఫిక్‌కు అంతరాయం ఏర్పడింది.

పోలీసులు కేసు నమోదు చేసి ప్రమాదానికి గల ఖచ్చితమైన కారణాలపై దర్యాప్తు చేస్తున్నారు. డ్రైవర్ అప్రమత్తత వల్ల పెను ప్రమాదం తప్పింది.