రూ.13,600 కోట్లతో హ్యామ్ రోడ్ల నిర్మాణాన్ని ప్రారంభించనున్న సీఎం రేవంత్

ముఖ్యమంత్రి రేవంత్ రెడ్డి రాష్ట్రంలో హైబ్రిడ్ యాన్యూటీ మోడల్ (హ్యామ్) రోడ్ల నిర్మాణ పనులను ప్రారంభించనున్నారు. నల్గొండ జిల్లా కనగల్ వద్ద ప్రత్యేక పైలాన్ను ఆవిష్కరించి ఈ పనులకు శ్రీకారం చుడతారు.

రాష్ట్రవ్యాప్తంగా 13,600 కోట్ల రూపాయల అంచనా వ్యయంతో 441 రహదారులను అభివృద్ధి చేయనున్నారు. ఇందులో 40 శాతం నిధులు ప్రభుత్వం సమకూరుస్తుంది. మిగిలిన 60 శాతం నిధులను కాంట్రాక్టర్ సంస్థ బ్యాంకు రుణాల ద్వారా సమకూరుస్తుంది. ఆ రుణాలకు ప్రభుత్వం గ్యారెంటీ ఇస్తుంది. 15 ఏళ్ల వ్యవధిలో గుత్తేదారుకు విడతల వారీగా ఈ మొత్తాన్ని చెల్లిస్తారు. ఈ రోడ్లకు ఎలాంటి టోల్ ఫీజు వసూలు చేయబోమని ప్రభుత్వం ఇప్పటికే ప్రకటించింది.

నల్గొండ జిల్లాలో ఈ ప్రాజెక్టులో భాగంగా సుమారు వంద కోట్ల రూపాయలతో పలు రహదారుల అభివృద్ధి చేపడతారు. వీటిలో నల్గొండ వైద్య కళాశాల నుంచి మేలదుప్పలపల్లి వరకు, దర్వేశపురం నుంచి దిండి వరకు, చిట్యాల నుంచి భువనగిరి వరకు రహదారులు ఉన్నాయి.

అనంతరం ముఖ్యమంత్రి నల్గొండలోని ఎన్జీ కళాశాల మైదానంలో ఏర్పాటు చేసిన బహిరంగ సభలో పాల్గొంటారు. ఈ సందర్భంగా 83 కోట్ల రూపాయలతో నల్గొండ మున్సిపల్ కార్పొరేషన్‌లో చేపట్టబోయే తొలి దశ తాగునీటి ప్రాజెక్టుకు శంకుస్థాపన చేస్తారు. ఈ కార్యక్రమానికి అధికార పార్టీ నాయకులు, కార్యకర్తలు భారీ సంఖ్యలో హాజరవుతారు. పటిష్ట బందోబస్తు ఏర్పాటు చేసినట్లు అధికారులు తెలిపారు.