ఎమ్మెల్యే, ఎంపీ పోటీ వయోపరిమితి 21కు తగ్గించాలి: సీఎం రేవంత్

తెలంగాణ సీఎం రేవంత్ రెడ్డి కీలక ప్రకటన చేశారు. ఎమ్మెల్యే, ఎంపీ ఎన్నికల్లో పోటీకి కనీస వయోపరిమితిని 25 ఏళ్ల నుంచి 21 ఏళ్లకు తగ్గించాలని రాష్ట్ర ప్రభుత్వం తీర్మానం చేయనుంది. ఈ మేరకు ఆగస్టు మొదటి వారంలో శాసనసభ ప్రత్యేక సమావేశాలు ఏర్పాటు చేస్తామని ఆయన ప్రకటించారు.

అసెంబ్లీలో తీర్మానం ఆమోదించిన తర్వాత దాన్ని ప్రధానమంత్రికి పంపుతామని సీఎం తెలిపారు. కాంగ్రెస్ పార్టీ రాహుల్ గాంధీ, మల్లికార్జున్ ఖర్గే నాయకత్వంలో పార్లమెంటులో రాజ్యాంగ సవరణ బిల్లు తేవడానికి కృషి చేస్తుందని చెప్పారు.

ప్రస్తుతం దేశంలో యువత జనాభా 30 శాతం ఉన్నప్పటికీ లోక్సభలో వారి ప్రాతినిధ్యం 1 శాతం లోపే ఉందని రేవంత్ రెడ్డి గుర్తు చేశారు. 21 ఏళ్లు నిండిన యువకులకు శాసనసభల్లో అవకాశం కల్పిస్తే దేశ భవిష్యత్తు మారుతుందని పేర్కొన్నారు.