తెలంగాణ రైలు ప్రాజెక్టులపై సీఎం రేవంత్ రెడ్డి, అశ్విని వైష్ణవ్ భేటీ

తెలంగాణలో రైలు ప్రాజెక్టు పనులను వేగవంతం చేయాలని కోరుతూ సీఎం రేవంత్ రెడ్డి కేంద్ర రైల్వే శాఖ మంత్రి అశ్విని వైష్ణవ్‌ను కలిశారు. శుక్రవారం ఢిల్లీలోని రైల్ భవన్‌లో ఈ భేటీ జరిగింది. మంత్రి వివేక్, ఎంపీలు ఈ సమావేశంలో పాల్గొన్నారు.

రాష్ట్రానికి కొత్త రైలు మార్గాలను మంజూరు చేయాలని సీఎం విజ్ఞప్తి చేశారు. హైదరాబాద్ చుట్టూ రీజనల్ రింగ్ రోడ్డు పక్కన దాదాపు 360 కిలోమీటర్ల మేర నిర్మించనున్న రీజనల్ రింగ్ రైల్‌కు అలైన్‌మెంట్ చేయాలని కోరారు. ఈ రైలుతో పెద్ద ఎత్తున ఉపాధి అవకాశాలు లభిస్తాయని ఆయన చెప్పారు.

తెలంగాణకు ప్రకటించిన హై స్పీడ్ రైలు పనులను కూడా వేగవంతం చేయాలని సీఎం కోరారు. హైదరాబాద్–పూణే, హైదరాబాద్–బెంగళూరు, హైదరాబాద్–చెన్నై కారిడార్లపై కేంద్రం పంపిన ప్రతిపాదనలను రాష్ట్ర ప్రభుత్వం సమీక్షించింది. కొన్ని మార్పులతో ప్రతిపాదనలను కేంద్రానికి పంపినట్టు సీఎం తెలిపారు. ఈ మూడు కారిడార్లకు భూసేకరణ ఇంకా ప్రారంభం కాలేదని ఆయన స్పష్టం చేశారు. కేంద్రం అలైన్‌మెంట్ ఆమోదించిన తర్వాతే భూసేకరణ మొదలవుతుందని చెప్పారు.

వికారాబాద్–కృష్ణ కొత్త రైలు మార్గాన్ని వెంటనే మంజూరు చేయాలని సీఎం కోరారు. వికారాబాద్ జిల్లా టేకల్‌కోట పరిసరాల్లో భారీ సున్నపురాయి నిక్షేపాలు బయటపడ్డాయి. ఈ ప్రాంతాన్ని సిమెంట్, టెక్స్‌టైల్ హబ్‌గా మార్చే ప్రణాళికలను కేంద్ర మంత్రికి వివరించారు. డోర్నకల్–గద్వాల్–కల్వకుర్తి–మాచర్ల–కాచిగూడ–జగ్గయపేట (250 కి.మీ), పటాన్‌చెరు–ఆదిలాబాద్ (320 కి.మీ), బోధన్–లాతూర్ (175 కి.మీ), అక్కన్నపేట బైపాస్ లైన్ (8 కి.మీ) మార్గాలను వెంటనే మంజూరు చేయాలని కోరారు.

దక్షిణ మధ్య రైల్వే చేపట్టదలచిన మెగా కోచింగ్ మెయింటెనెన్స్ డిపోను మహబూబాబాద్ సమీపంలోని అనంతారం గ్రామంలో ఏర్పాటు చేయాలని సీఎం కోరారు. ఈ డిపో కోసం అవసరమైన 409 ఎకరాల భూమిని రైల్వే శాఖకు అప్పగించేందుకు రాష్ట్ర ప్రభుత్వం ఇప్పటికే అంగీకరించినట్టు కేంద్ర మంత్రికి తెలిపారు. త్వరగా అనుమతులు మంజూరు చేయాలని విజ్ఞప్తి చేశారు.