బడ్జెట్ లక్ష్యాల సాధనపై అధికారులకు సీఎం రేవంత్ రెడ్డి దిశానిర్దేశం

తెలంగాణ ముఖ్యమంత్రి రేవంత్ రెడ్డి అధికారులకు ఆదాయం పెంచి బడ్జెట్ లక్ష్యాలను తప్పనిసరిగా సాధించాలని ఆదేశించారు. ఆదాయ సమీకరణలో ఎలాంటి నిర్లక్ష్యానికి తావు ఇవ్వొద్దని స్పష్టం చేశారు.

హెచ్ఎండీఏ, టీజీఐసీ వంటి సంస్థలు ఆదాయ వనరులను మరింత సమర్థంగా ఉపయోగించుకోవాలని సీఎం సూచించారు. కమర్షియల్ టాక్సెస్, ఎక్సైజ్, మైనింగ్ తదితర శాఖల్లో ఎలాంటి లీకేజీలు జరగకుండా కట్టుదిట్టమైన చర్యలు తీసుకోవాలన్నారు. ఆదాయ లక్ష్యాల సాధన కోసం ప్రత్యేక చేజింగ్ సెల్ ఏర్పాటు చేసి నిరంతర పర్యవేక్షణ కొనసాగించాలని ఆదేశించారు.

సంక్షేమ పథకాల అమలులో పారదర్శకత కోసం ఏఐ టెక్నాలజీని వినియోగించి, లబ్ధిదారుల జాబితాను డిజిటల్ వ్యవస్థతో అనుసంధానం చేయాలని సీఎం సూచించారు. పెండింగ్ ప్రాజెక్టులను వేగంగా పూర్తి చేసేందుకు బడ్జెట్ కేటాయింపులు ఉండేలా చూడాలని, భూసేకరణకు అత్యంత ప్రాధాన్యం ఇవ్వాలని చెప్పారు.

ఊహాజనిత అంచనాల ఆధారంగా కాకుండా వాస్తవ పరిస్థితులను పరిగణనలోకి తీసుకుని బడ్జెట్ రూపొందించాలని రేవంత్ రెడ్డి అధికారులకు దిశానిర్దేశం చేశారు. అవసరమైన అన్ని విధాలా సహకారం అందించేందుకు ప్రభుత్వం సిద్ధంగా ఉందని, నిర్లక్ష్యానికి తావివ్వకుండా బాధ్యతాయుతంగా పని చేయాలని అన్నారు.