సీఎం రేవంత్ రెడ్డి: ఆగస్టు 15 నాటికి విద్యార్థులందరికీ ఎడ్యుకేషన్ కిట్లు; విద్యకు ₹30,000 కోట్ల బడ్జెట్

దేవరకద్ర సెగ్మెంట్‌లోని కొత్తకోటలో జెడ్పి హైస్కూల్ ప్రారంభోత్సవంలో ముఖ్యమంత్రి రేవంత్ రెడ్డి పాల్గొన్నారు. రాష్ట్రంలోని ప్రభుత్వ పాఠశాల విద్యార్థులందరికీ ఆగస్టు 15 నాటికి ఎడ్యుకేషన్ కిట్లు అందజేస్తామని ప్రకటించారు. విద్యాశాఖను తన వద్దే ఉంచుకున్నానని, భవిష్యత్తు తరగతి గదుల్లోనే ఉందని విశ్వసిస్తున్నానన్నారు.

రాష్ట్రంలో లక్షకు పైగా ఉపాధ్యాయులు పనిచేస్తున్నారని, విద్యారంగానికి ఏడాదికి ₹30,000 కోట్ల బడ్జెట్ కేటాయించామని తెలిపారు. చదువుతో పాటు క్రీడల్లోనూ రాణించాలని విద్యార్థులకు సూచించారు.

అమరరాజా గిగాఫ్యాక్టరీ కారిడార్‌లోని కస్టమర్ క్వాలిఫికేషన్ ప్లాంట్‌ను ప్రారంభించిన సందర్భంగా సీఎం ఆర్థిక లక్ష్యాలను వివరించారు. 2034 నాటికి $1 ట్రిలియన్ ఆర్థిక వ్యవస్థ సాధించడం లక్ష్యమని, 2047 నాటికి దేశ జీడీపీలో 10 శాతం తెలంగాణ నుంచే రావాలని టార్గెట్ పెట్టుకున్నామన్నారు. ఈ యూనిట్‌ ద్వారా 700 మందికి ఉద్యోగాలు లభిస్తాయని, వీరిలో 400 మంది మహిళలేనని పేర్కొంటూ మహిళా సాధికారతను అభినందించారు.

పాలమూరు, రంగారెడ్డి ఎత్తిపోతల పథకాలకు నీటి కేటాయింపుపై కేంద్రం ఏపీతో సంప్రదింపులు జరుపుతోందని, త్వరలోనే రైతులకు శుభవార్త అందిస్తామని చెప్పారు. ప్యూర్, క్యూర్, రేర్ విధానంతో రాష్ట్రాన్ని అత్యంత అభివృద్ధి చెందిన రాష్ట్రంగా మారుస్తామన్నారు. ప్రతిపక్ష విమర్శలను పట్టించుకోకుండా నీళ్లు, నిధులు, విద్య, వైద్యం విషయంలో రాజీ పడబోమని స్పష్టం చేశారు.