కాళేశ్వరం ప్రాజెక్ట్పై రేవంత్ ప్రభుత్వాన్ని విమర్శించిన కేటీఆర్

కాళేశ్వరం ప్రాజెక్టుపై ముఖ్యమంత్రి రేవంత్ రెడ్డి ‘శిఖండి రాజకీయాలు’ చేస్తున్నారని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. ఎన్డీఎస్ఏ రిపోర్టును అడ్డం పెట్టుకుని సీఎం రాజకీయ ఆరోపణలు చేస్తున్నారన్నారు. కన్నెపల్లి నుంచి నీళ్లు ఎత్తిపోయడం లేదని, అది ప్రభుత్వ అహంకారంతో జరుగుతోందని కేటీఆర్ పేర్కొన్నారు.

ఆంధ్రప్రదేశ్ ప్రభుత్వం పట్టిసీమ నుంచి నీళ్లు ఎత్తి రైతులకు అందిస్తున్న తీరును చూసి తెలంగాణ ప్రభుత్వం నేర్చుకోవాలని సూచించారు. రేవంత్ రెడ్డిది క్రిమినల్ నెగ్లిజెన్సీ అని విమర్శించారు. ఢిల్లీలో ఎన్డీఎస్ఏ అధికారులను రేవంత్ కలవకపోవడంపైనా ప్రశ్నించారు.

ఇదే సందర్భంగా ఢిల్లీలో కేంద్ర మంత్రి హెచ్డీ కుమారస్వామిని కలిసి ఆదిలాబాద్ సిమెంట్ కార్పొరేషన్ ఆఫ్ ఇండియా ఫ్యాక్టరీ పునరుద్ధరణపై చర్చించారు. సీసీఐ విషయంలో ప్రభుత్వాలు దిగివచ్చేవరకు పోరాడతామని తెలిపారు. కాళేశ్వరం ప్రాజెక్టుపై సీఎం రేవంత్ రెడ్డి స్పందన ప్రస్తుతానికి తెలియాల్సి ఉంది.