ప్రొద్దుటూరు జడ్పి పాఠశాలలో మంత్రి లోకేశ్ ఆకస్మిక తనిఖీ

ఏపీ మంత్రి నారా లోకేశ్ బుధవారం కడప జిల్లా ప్రొద్దుటూరు మండలం దొరసానిపల్లి జడ్పి ఉన్నత పాఠశాలను ఆకస్మికంగా సందర్శించారు. విద్యార్థులతో మాట్లాడి, మౌలిక సదుపాయాలు, మధ్యాహ్న భోజన నాణ్యతపై ఆరా తీశారు.

ఈ సందర్భంగా ఆయన 10వ తరగతి విద్యార్థులతో మాట్లాడుతూ, తన భవిష్యత్తు వారి చేతుల్లోనే ఉందని చెప్పారు. విద్యార్థులకు అవసరమైన పుస్తకాలు, యూనిఫాం, తల్లికి వందనం వంటి పథకాలు ప్రభుత్వం అమలు చేస్తుందని వివరించారు. మధ్యాహ్న భోజనం బాగుందని విద్యార్థులు మంత్రికి తెలియజేశారు.

పాఠశాల లెర్నింగ్ అవుట్కమ్స్ రేటింగ్ 1.3 స్టార్ ఉండడంపై ప్రిన్సిపాల్ ధనలక్ష్మిని లోకేశ్ ప్రశ్నించారు. ఫార్మాటివ్, సమ్మేటివ్ అసెస్మెంట్‌పై తల్లిదండ్రుల్లో అవగాహన పెంచాలని, హాజరు శాతం మెరుగుపరచాలని అధికారులను ఆదేశించారు. వెనుకబడిన పాఠశాలలను ప్రతి 15 రోజులకు ఎంఈఓలు సమీక్షించాలని సూచించారు.

పాఠశాలలో విద్యార్థుల సంఖ్య గత ఏడాది కంటే తగ్గడంపై విచారణ చేయగా, 10 మంది వసతి గృహాలకు, కేజీబీవీలకు వెళ్లడమే కారణమని ప్రిన్సిపాల్ వివరించారు. అయితే, అకాడమిక్ పనితీరు మెరుగైనందుకు మంత్రి ఉపాధ్యాయులను ప్రశంసించారు. వచ్చే ఏడాదికి ఫోర్ స్టార్ రేటింగ్ సాధిస్తామని ప్రిన్సిపాల్ హామీ ఇచ్చారు. అనంతరం మంత్రి స్థానికుల నుంచి వినతులు స్వీకరించారు.