అమరావతి రెండో దశ మాస్టర్ ప్లాన్ 22 వారాల్లో: సింగపూర్ సంస్థ ప్రకటన

రాజధాని అమరావతి రెండో దశ మాస్టర్ ప్లాన్‌ను 22 వారాల్లో అందిస్తామని సింగపూర్‌కు చెందిన సుర్బానా జురాంగ్ సంస్థ ప్రతినిధులు తెలిపారు. రెండో దశలో మొత్తం 709.6 చదరపు కిలోమీటర్ల ప్రాంతానికి ఈ సంస్థ సమీకృత మాస్టర్ ప్లాన్ రూపొందిస్తుంది.

రాజధాని ప్రాంతంలో రెండు రోజుల పాటు పర్యటించిన సింగపూర్ ప్రతినిధుల బృందం బుధవారం ముఖ్యమంత్రి చంద్రబాబు నాయుడిని కలిసింది. అమరావతిని ప్రపంచ స్థాయి నగరంగా తీర్చిదిద్దాలని, వివిధ ప్రాంతాల ప్రజలు నివసించేలా నివాస యోగ్యంగా ఉండాలని సీఎం సూచించారు. ఇన్నర్, ఔటర్ రింగ్ రోడ్లతో అంతర్జాతీయ స్థాయి నగరంగా నిర్మిస్తున్నట్టు, గ్రీన్ ఎనర్జీ, గ్రీన్ బిల్డింగ్‌లతో పర్యావరణ అనుకూల విధానాలు అమలు చేస్తున్నట్టు ఆయన తెలిపారు.

అమరావతిని ఆర్థికంగా బలోపేతం చేసేలా క్రియేటివ్ సిటీ నిర్మాణం, సమ్మిళిత పట్టణాభివృద్ధికి ప్రాధాన్యం ఇస్తున్నట్టు సీఎం పేర్కొన్నారు. ఈ సందర్భంగా సింగపూర్ ప్రతినిధులు ప్రాజెక్టు పరిధి, అమలు ప్రణాళిక, దశలవారి కార్యాచరణను వివరించారు. ఏరియా ప్లాన్, మౌలిక వసతుల ప్రణాళిక, పెట్టుబడి నమూనా వంటి అంశాలను ప్రాజెక్టులో భాగం చేస్తున్నట్టు తెలిపారు.

ఇదే రోజు ఏపీ ప్రభుత్వం, ఐక్యరాజ్య సమితికి చెందిన యూఎన్ హ్యాబిటాట్ మధ్య పట్టణాభివృద్ధిపై అవగాహన ఒప్పందం కుదిరింది. పేదరిక నిర్మూలన, పట్టణ పేదల జీవనోపాధి మెరుగుదల కోసం ఈ ఒప్పందం చేసుకున్నారు. అమరావతిలో పట్టణ వ్యవహారాలపై సెంటర్ ఆఫ్ ఎక్సలెన్స్ ఏర్పాటు చేస్తారు. 2028లో మెక్సికోలో జరిగే ప్రపంచ పట్టణ ఫోరం (వరల్డ్ అర్బన్ ఫోరం)లో ఏపీ విజయాలను ప్రదర్శించనున్నట్లు అధికారులు తెలిపారు.