బోనాల ఉత్సవాలకు సర్వం సిద్ధం: రేపు తొలి బోనం, 29 ఆలయాల్లో పట్టు వస్త్రాలు

భాగ్యనగరంలో ఆషాఢ మాసం సందర్భంగా బోనాల ఉత్సవాలు రేపు ప్రారంభం కానున్నాయి. గోల్కొండ కోటలోని జగదాంబిక మహంకాలి ఆలయంలో ప్రభుత్వం తరపున తొలి బోనం సమర్పణతో ఉత్సవాలకు అంకురార్పణ జరుగుతుంది.

ఈ కార్యక్రమంలో స్పీకర్ గడ్డం ప్రసాద్ కుమార్, మంత్రులు కొండా సురేఖ, పొన్నం ప్రభాకర్ పాల్గొంటారు. సికింద్రాబాద్ ఉజ్జయిని మహంకాలి ఆలయంలో సీఎం రేవంత్ రెడ్డి పట్టు వస్త్రాలు సమర్పించనున్నారు. 29 ప్రధాన ఆలయాల్లో మంత్రులు, ప్రజా ప్రతినిధులు పట్టు వస్త్రాలు సమర్పించే షెడ్యూల్ ఖరారు చేశారు. బాలకంపేట ఎల్లమ్మ కళ్యాణోత్సవంలో మంత్రులు కొండా సురేఖ, పొన్నం ప్రభాకర్ పాల్గొననుండగా, లాల్ దర్వాజా సింహవాహిని మహంకాలి ఆలయంలో డిప్యూటీ సీఎం భట్టి విక్రమార్క, బేలా ముత్యాలమ్మ ఆలయంలో మంత్రి గడ్డం వివేక్ వెంకట్ స్వామి తదితరులు పట్టు వస్త్రాలు సమర్పిస్తారు.

బోనాల ముగింపు వేడుకల్లో భాగంగా ఆగస్టు 10న అంబారి ఊరేగింపు జరగనుంది. కర్ణాటక నుంచి లక్ష్మి అనే 34 ఏళ్ల ఏనుగును తీసుకువచ్చారు. హరిబౌలిలోని అక్కన్న మాదన్న ఆలయం నుంచి సబ్జీ మండి మీదుగా సికింద్రాబాద్ ఉజ్జయిని మహంకాలి ఆలయానికి ఊరేగింపు చేరుకుంటుంది.

సీఎం రేవంత్ రెడ్డి ఆదేశాలతో ప్రభుత్వం రూ.20 కోట్ల నిధులు మంజూరు చేసింది. ఇందులో రూ.15 కోట్లు ఆలయాల్లో ఏర్పాట్లకు, మిగిలిన రూ.5 కోట్లు ప్రమోషన్‌కు వినియోగించనున్నారు. భక్తుల కోసం క్యూ లైన్లు, తాగునీరు, పారిశుధ్యం వంటి సౌకర్యాలను దేవాదాయ, పోలీసు, జీహెచ్ఎంసీ అధికారులు సమన్వయంతో పూర్తి చేశారు. పోలీస్ శాఖ ట్రాఫిక్ నియంత్రణ, భారీ బందోబస్తు ఏర్పాటు చేసింది.