ఏపీ ఉద్యోగుల కోసం కొత్త జోనల్ వ్యవస్థ, బదిలీలు, ప్రమోషన్లపై ఉత్తర్వులు

ఆంధ్రప్రదేశ్ ప్రభుత్వం రాష్ట్ర ప్రభుత్వ ఉద్యోగుల విభజన, బదిలీలు, పదోన్నతుల కోసం కొత్త జోనల్ వ్యవస్థను ప్రవేశపెట్టింది.

AP పబ్లిక్ ఎంప్లాయ్మెంట్ ఆర్డర్ 2025 ఆధారంగా ఆరు రెవెన్యూ జోన్లు, రెండు మల్టీ జోన్లను ఏర్పాటు చేస్తూ ప్రభుత్వం ఉత్తర్వులు జారీ చేసింది. రాష్ట్రంలో కొత్తగా ఏర్పడిన 26 జిల్లాల విభజనకు అనుగుణంగా ఈ జోనల్ వ్యవస్థను రూపొందించారు.

ఈ కొత్త విధానం ప్రకారం, వివిధ ప్రభుత్వ శాఖల్లోని జిల్లా స్థాయి, జోనల్, మల్టీ జోనల్, రాష్ట్ర స్థాయి పోస్టులను స్పష్టంగా నిర్వచించారు. స్థానిక ఉద్యోగులకు ప్రాధాన్యత కల్పించేలా నియమాలు రూపొందించినట్లు ప్రభుత్వం తెలియజేసింది.

ఈ సంస్కరణలతో గతంలో ఎదురైన న్యాయపరమైన వివాదాలు నివారించబడతాయని, ఉద్యోగుల కేటాయింపు ప్రక్రియ సాఫీగా సాగుతుందని అధికారులు వివరించారు. ఆయా శాఖల్లో ఖాళీలను గుర్తించి పదోన్నతుల ప్రక్రియ వేగవంతం చేయడానికి, భవిష్యత్ నియామకాలకు ఈ కొత్త జోనల్ క్యాడర్ మార్గదర్శిగా ఉంటుందని ప్రభుత్వం పేర్కొంది.