తెలంగాణలో ఎల్ నినో ప్రభావంతో వర్షాభావం.. రైతులు ప్రత్యేక పూజలు

తెలంగాణలో ఎల్నినో ప్రభావంతో ఖరీఫ్ సీజన్ ప్రారంభమై రెండు నెలలు గడుస్తున్నా సరైన వర్షాలు కురవలేదు. వర్షాభావంతో రైతులు ఆందోళన వ్యక్తం చేస్తున్నారు. పంటలు సాగు చేయాల్సిన సమయంలో వర్షం లేకపోవడంతో అనేక జిల్లాల్లో రైతులు వర్షాల కోసం ప్రత్యేక ప్రార్థనలు, ఆచారాలు నిర్వహిస్తున్నారు.

హనుమకొండ జిల్లా పరకాలలో వరి, పత్తి, మొక్కజొన్న, మిర్చి పంటలు సాగు చేస్తున్న రైతులు విత్తనాలు వేసి వర్షం కోసం ఎదురుచూస్తున్నారు. మంచిర్యాల జిల్లా బెల్లంపల్లి మండలం చిన్నబోదలో స్థానికులు కప్పతల్లి ఆట ఆడి, గ్రామదేవతలకు జలాభిషేకం చేశారు.

రాజన్న సిరిసిల్ల జిల్లా బోయినపల్లి మండలం అనంతపల్లిలో మహిళలు నాట్లు వేస్తూ వర్షం కోసం పాటలు పాడారు. సిద్దిపేట జిల్లా హుస్నాబాద్ మండలం పొట్లపల్లిలో కప్పతల్లి ఆట ఆడి, స్థానిక స్వయంభు రాజేశ్వర స్వామి ఆలయంలో జలాభిషేకం, ప్రదక్షణలు చేశారు.

చెరువులు, కుంటల్లో నీరు అడుగంటి ఉండగా, బోర్లు, బావుల్లో కూడా నీటి మట్టం తగ్గింది. రైతులు పత్తి, వరి పంటల భవిష్యత్తుపై అనిశ్చితిలో ఉన్నారు. నిపుణులు వర్షాలు కురవకపోతే పంటల దిగుబడిపై తీవ్ర ప్రభావం పడే అవకాశం ఉందని ఆందోళన వ్యక్తం చేస్తున్నారు.