సీఎం రేవంత్ రెడ్డి నేడు నల్గొండలో హ్యాం రోడ్ల ప్రారంభం; విపక్షాలు నిరసనకు సిద్ధం

తెలంగాణ ముఖ్యమంత్రి రేవంత్ రెడ్డి నేడు నల్గొండ జిల్లాలో హ్యాం రోడ్ల ప్రారంభోత్సవం చేయనున్నారు. మధ్యాహ్నం 3:30 గంటలకు కనగల్ మార్కెట్ యార్డ్‌లో హ్యాం రోడ్ల పైలాన్‌ను ఆయన ఆవిష్కరిస్తారు.

అనంతరం నల్గొండ పోలీస్ ట్రైనింగ్ సెంటర్‌లో కార్యక్రమంలో పాల్గొంటారు. ఎన్జీ కళాశాల ప్రాంగణంలో ఏర్పాటు చేసిన బహిరంగ సభకు ముందు, రూ.83 కోట్లతో నల్గొండ మున్సిపల్ కార్పొరేషన్ తాగునీటి పథకం మొదటి దశకు శంకుస్థాపన చేస్తారు.

ఈ సందర్భంగా బీఆర్ఎస్, బీజేపీ పార్టీలు నిరసనలు చేపట్టనున్నాయి. గత రెండున్నరేళ్లలో నల్గొండ నియోజకవర్గంలో అభివృద్ధి జరగలేదని, కేసీఆర్ హయాంలో మొదలైన ప్రాజెక్టులు నిలిచిపోయాయని వారు ఆరోపిస్తున్నారు. పెండింగ్ ప్రాజెక్టులకు నిధులు విడుదల చేయాలని డిమాండ్ చేస్తున్నారు.

మహాత్మా గాంధీ యూనివర్సిటీలో సమస్యల పరిష్కారం, నియామకాల్లో అవినీతిపై విచారణ చేపట్టాలని విద్యార్థి సంఘాలు కూడా డిమాండ్ చేస్తున్నాయి.

నిరసనల నేపథ్యంలో పోలీసులు గట్టి బందోబస్తు ఏర్పాటు చేశారు.