వైఎస్ రాజశేఖర్ రెడ్డి జయంతి: సీఎం రేవంత్, మంత్రుల నివాళి

హైదరాబాద్: ఉమ్మడి ఆంధ్రప్రదేశ్ మాజీ ముఖ్యమంత్రి వైఎస్ రాజశేఖర రెడ్డి జయంతి సందర్భంగా రాష్ట్ర వ్యాప్తంగా కాంగ్రెస్ నేతలు నివాళులు అర్పించారు. సీఎం రేవంత్ రెడ్డి జూబ్లీ హిల్స్ లోని తన నివాసంలో వైఎస్ చిత్రపటానికి పూలమాలలు వేశారు. డిప్యూటీ సీఎం భట్టి విక్రమార్క, మంత్రి కోమటిరెడ్డి, ఎంపీ రఘువీర్ రెడ్డి తదితరులు హాజరయ్యారు.

పంజాగుట్టలోని వైఎస్సార్ విగ్రహం వద్ద, గాంధీ భవన్ లో మంత్రులు శ్రీధర్ బాబు, వివేక్, మాజీ ఎంపీ కేవీపీ రామచంద్రరావు సహా పలువురు నేతలు నివాళులు అర్పించారు. రాజన్న సిరిసిల్ల జిల్లా వేములవాడ, మంచిర్యాల జిల్లా చెన్నూరు ఎమ్మెల్యే క్యాంపు కార్యాలయంలో కూడా జయంతి కార్యక్రమాలు నిర్వహించారు.

ఈ సందర్భంగా సీఎం రేవంత్ రెడ్డి, మంత్రులు మాట్లాడుతూ వైఎస్ ప్రవేశపెట్టిన ఉచిత విద్యుత్, ఆరోగ్యశ్రీ ఫీజు రీయింబర్స్‌మెంట్ పథకాలను గుర్తు చేశారు. 2005లో 1,737 కోట్ల రూపాయల లిఫ్ట్ ఇరిగేషన్ పథకాన్ని ఆయన మంజూరు చేశారని, హైదరాబాద్‌లో శంషాబాద్ విమానాశ్రయం, ఔటర్ రింగ్ రోడ్డు, మెట్రో ప్రాజెక్టులు వైఎస్ నేతృత్వంలో రూపుదిద్దుకున్నాయని మంత్రి శ్రీధర్ బాబు తెలిపారు.