ఫ్యూచర్ సిటీలో మహిళా పారిశ్రామికవేత్తలకు స్థలం కేటాయింపు: సీఎం రేవంత్ రెడ్డి

మహిళా పారిశ్రామికవేత్తల కోసం ఫ్యూచర్ సిటీలో స్థలం కేటాయిస్తున్నట్లు ముఖ్యమంత్రి రేవంత్ రెడ్డి ప్రకటించారు. 22 జిల్లా కేంద్రాల్లో ఇందిరా మహిళా శక్తి భవనాలు ఏర్పాటు చేస్తామని, వాటిని శిక్షణ, మార్కెటింగ్ కేంద్రాలుగా అభివృద్ధి చేస్తామని తెలిపారు.

హైదరాబాద్‌లోని MCRHRD లో FICCI లేడీస్ ఆర్గనైజేషన్ (FLO) హైదరాబాద్ చాప్టర్ 25వ వార్షికోత్సవ కార్యక్రమంలో ముఖ్యమంత్రి మాట్లాడారు. ఫ్యూచర్ సిటీలోని శిల్పారామం పక్కన 1000 గజాల స్థలాన్ని FLO కి మహిళా పారిశ్రామిక పార్క్ కోసం కేటాయించామని ప్రకటించారు. ఇదివరకే శిల్పారామం వద్ద రూ.1000 కోట్ల విలువైన స్థలాన్ని ఇందిరా మహిళా శక్తి బజార్‌కు కేటాయించగా, అక్కడ 150కి పైగా దుకాణాలు విజయవంతంగా నడుస్తున్నాయని వివరించారు.

ముఖ్యమంత్రి మాట్లాడుతూ, రాష్ట్రంలో మహిళా స్వయం సహాయక సంఘాలు పెట్రోల్ బంకులు నిర్వహించడం, 1000 ఆర్టీసీ బస్సులు అద్దెకు నడపడం, 1000 మెగావాట్ల సౌర విద్యుత్ ఉత్పత్తి వంటి అనేక రంగాల్లో రాణిస్తున్నాయని తెలిపారు. 27 వేల ప్రభుత్వ పాఠశాలల నిర్వహణ, 27.5 లక్షల మంది విద్యార్థులకు యూనిఫామ్ కుట్టే బాధ్యతను మహిళా సంఘాలకు అప్పగించామని చెప్పారు. ఫ్యూచర్ సిటీకి ఫార్చూన్ 500 కంపెనీలను తీసుకురావాలన్న లక్ష్యంలో మహిళా పారిశ్రామికవేత్తల పాత్ర కీలకమని నొక్కి చెప్పారు.

తెలంగాణ 2034 నాటికి ట్రిలియన్ డాలర్ల, 2047 నాటికి 3 ట్రిలియన్ డాలర్ల ఆర్థిక వ్యవస్థ లక్ష్యంగా పెట్టుకుందని ముఖ్యమంత్రి తెలియజేశారు. దీనిలో మహిళల ఆర్థిక భాగస్వామ్యం అవసరమని, మొదటి పారిశ్రామిక పార్క్ విజయవంతం కావడంతో మరో పార్క్ అభివృద్ధి చేసే అంశం పరిశీలిస్తామని చెప్పారు. 2013లో సోనియా గాంధీ ప్రవేశపెట్టిన మహిళా రిజర్వేషన్ బిల్లు వచ్చే ఎన్నికల తర్వాత అమలవుతుందని ఆశిస్తున్నట్లు పేర్కొన్నారు.