కడపలో RM కిసాన్ సెంటర్ లో రైతు అవగాహన సదస్సు

వైఎస్సార్ కడప జిల్లా వీరపునాయునిపల్లె మండలం పాలగిరి గ్రామంలోని RM కిసాన్ సెంటర్ లో రైతుల కోసం అవగాహన సదస్సు నిర్వహించారు.

ప్రతిభా బయోటెక్ ఆధ్వర్యంలో జరిగిన ఈ కార్యక్రమంలో బారామతి కృషి విజ్ఞాన కేంద్రంతో సాంకేతిక సమాచార పరస్పర అవగాహన ఒప్పందం కుదుర్చుకున్నారు.

సదస్సుకు జిల్లా కలెక్టర్ చెరుకూర శ్రీధర్, కమలాపురం ఎమ్మెల్యే పుత్త చైతన్య రెడ్డి హాజరై RM కిసాన్ సెంటర్ ను పరిశీలించారు.

2005లో ప్రారంభమైన ప్రతిభా బయోటెక్, 2023లో 95 ఎకరాల్లో RM కిసాన్ సెంటర్ ను స్థాపించింది. ఈ కేంద్రం రైతులకు ఉచితంగా ఆధునిక వ్యవసాయ శిక్షణ, మట్టి పరీక్షలు, సమగ్ర ఎరువుల యాజమాన్యం, చీడపీడల నివారణపై అవగాహన కల్పిస్తోంది.

ప్రతిభా బయోటెక్ చైర్మన్ డాక్టర్ రాజశేఖర్ మాట్లాడుతూ, దేశవ్యాప్తంగా 16 రాష్ట్రాల్లో రైతు సదస్సులు నిర్వహిస్తున్నామని, రాయలసీమలో ఈ కేంద్రాన్ని హార్టికల్చర్ హబ్‌గా తీర్చిదిద్దుతామని తెలిపారు. హైడ్రోపోనిక్స్, పశుసంవర్ధకం, మత్స్య పెంపకం వంటి అంశాల్లో రైతులకు శిక్షణ ఇవ్వనున్నట్లు వివరించారు.