మహారాష్ట్ర సరిహద్దు జుక్కల్ మండలంలో రహదారుల లేమితో గ్రామాల జనం అవస్థలు

మహారాష్ట్ర సరిహద్దులోని కామారెడ్డి జిల్లా జుక్కల్ మండలంలోని మాదాపూర్, చండేగావ్‌, హంగర్గా, బిజ్జల్వాడి, కదల్వాడి గ్రామాల ప్రజలు రహదారుల సమస్యలతో ఇబ్బందులు పడుతున్నారు.

ఈ గ్రామాల రైతులు తమ పంటలు, కూరగాయలను మహారాష్ట్రలోని దెగ్లూర్ మార్కెట్‌కు తరలిస్తుంటారు. రూర్బన్ పథకం కింద రూ.90 లక్షలతో చండేగావ్-దేవాపూర్ రోడ్డు మధ్య వంతెన నిర్మించారు. ఆ వంతెన నుంచి దేవాపూర్ వరకు తారు రోడ్డు వేసేందుకు 2023లో రూ.కోటి నిధులతో శంకుస్థాపన జరిగింది. కానీ రోడ్డు పనులు ఇంకా ప్రారంభం కాలేదు.

వర్షాకాలంలో మాదాపూర్ సమీపంలోని లో-లెవెల్ వంతెనపై నీరు ప్రవహించడంతో రాకపోకలు నిలిచిపోతున్నాయి. కొన్ని గ్రామాలు జలదిగ్బంధంలో ఉంటున్నాయి. అత్యవసరమైతే ఆసుపత్రులకు వెళ్లేందుకు తీవ్ర ఇబ్బందులు ఎదురవుతున్నాయని స్థానికులు తెలిపారు.

రైతులు సొంతంగా నగదు పోగు చేసి రోడ్డుపై మట్టి వేస్తున్నా వర్షాలకు అది కొట్టుకుపోతోంది. మహారాష్ట్ర-తెలంగాణ మధ్య కేవలం 2 కిలోమీటర్ల మేర తారు రోడ్డు, ఓ కల్వర్టు నిర్మిస్తే సమస్య పరిష్కారమవుతుందని గ్రామస్తులు కోరుతున్నారు. ఇప్పటికైనా అధికారులు స్పందించాలని వారు విజ్ఞప్తి చేస్తున్నారు.