నాంపల్లి క్రిమినల్ కోర్టులో తెల్లవారుజామున అగ్ని ప్రమాదం

హైదరాబాద్ నాంపల్లి క్రిమినల్ కోర్టు భవనంలో తెల్లవారుజామున అగ్ని ప్రమాదం జరిగింది. మూడో అంతస్తులో మంటలు చెలరేగాయి.

సమాచారం అందుకున్న అగ్నిమాపక సిబ్బంది రెండు ఫైర్ ఇంజన్లతో హుటాహుటిన చేరుకుని మంటలను అదుపులోకి తెచ్చారు. ఘటనలో ప్రాణ నష్టం జరిగినట్లు సమాచారం లేదు.

నాంపల్లి పోలీసులు కేసు నమోదు చేసి దర్యాప్తు ప్రారంభించారు. షార్ట్ సర్క్యూట్ వల్లే ప్రమాదం సంభవించిందని అనుమానిస్తున్నారు. అయితే, ప్రమాద కారణాలు ఇంకా స్పష్టంగా తెలియరాలేదు.

మంటల్లో కోర్టు ఫైల్స్ దెబ్బతిన్నాయా అనే విషయం తెలియాల్సి ఉంది. అగ్నిమాపక శాఖ అధికారులు ఆధారాలు సేకరిస్తున్నారు.